Mundaı tapsyrmany Oqý-aǵartý mınıstri Ǵanı Beısembaev óńirler ákimderiniń orynbasarlarymen, bilim basqarmalary men bilim berý salasyndaǵy sapany qamtamasyz etý departamentteriniń basshylarymen ótken shuǵyl keńes barysynda berdi, dep habarlaıdy Egemen.kz.
Balalardyń quqyqtaryn qorǵaý komıtetiniń tóraǵasy Nasymjan Ospanova Petropavl mektebinde júrgizilgen tekserý nátıjeleri men basqa oqý oryndarynda qaýipsizdikti qamtamasyz etý josparlary týraly aıtyp berdi.
«Komıtet ádistemelik jáne psıhologııalyq kómek boıynsha jumysty jalǵastyrady. Memleket basshysynyń tapsyrmasy boıynsha 2019 jyldan bastap bilim berý obektilerindegi qaýipsizdik jaǵdaıyna toqsan saıyn monıtorıng júrgiziledi. Kelesi aptadan bastap bir aı boıy bala quqyqtary jónindegi óńirlik ýákilderdiń, ata-analardyń, sarapshylardyń, búkil el boıynsha úkimettik emes uıymdardyń qatysýymen oqý oryndarynda qaýipsizdikti uıymdastyrý máselesi boıynsha tekserý júrgizemiz», dep atap ótti ol.
Vedomstvonyń baspasóz qyzmeti habarlaǵandaı, qazirgi ýaqytta komıtet múddeli memlekettik organdardyń qyzmetin úılestirýdi jáne taldaýdy júzege asyratyn quqyqtyq bazany qalyptastyrý boıynsha jumys júrgizp jatyr.
О́tken jyly obektilerdi terrorızmge qarsy qorǵaýdy uıymdastyrý jónindegi nusqaýlyq ázirlengenin eske salaıyq. Sondaı-aq bıyl qańtar aıynda óńirlerge pedagogtar men bilim alýshylarǵa arnalǵan is-qımyl algorıtmderi jiberildi.
«Mınıstrlik balalardy zorlyq-zombylyqtan, sýısıdten qorǵaý jáne ál-aýqat quqyqtaryn qamtamasyz etý, onyń ishinde qaýipsizdik júıesin uıymdastyrý jónindegi keshendi jospardyń jobasyn ázirlep jatyr. Oǵan 20-ǵa jýyq memlekettik organdar men óńirler jumyldyrylǵan», dedi Nasymjan Ospanova.
Sońynda Ǵanı Beısembaev elimizdiń barlyq oqý oryndaryna 2023 jylǵy 20 aqpannan 20 naýryzǵa deıin keshendi qaýipsizdik júıesimen qamtamasyz etilýine muqııat monıtorıng júrgizýdi, osy máselede ózara is-qımyldyń pármendi tetikterin ázirleýdi tapsyrdy.