Memleket basshysy Qasym-Jomart Toqaev Qazaqstan halqyna Joldaýynda da, túrli jıyndarda da buqaralyq sportqa kóńil bólý qajettigin eskertip keledi. Buqaralyq sporttyń damýy shyraıly Shyǵysta oıdaǵydaı deýge bolady. Turǵyndardyń 30 paıyzy bos ýaqyttaryn mándi de sándi ótkizedi.
Bir ǵana mysal. Jaqynda О́skemen qalasyndaǵy «Imperııa» bılıard klýbynda óńirdiń ekonomıkasy, mádenıeti men sportynyń damýyna ózindik úles qosqan, oblys, aýdandardy basqaryp turǵan kezinde jaǵymdy jańalyqtarmen jerlesterin qýantqan memleket jáne qoǵam qaıratkeri, Qazaqstan Respýblıkasy «Álem qyrandary» bılıardshylar qoǵamdastyǵy Shyǵys Qazaqstan oblystyq fılıalynyń tóraǵasy Túsiphan Túsipbekovtiń 70 jyldyq mereıtoıyna arnalǵan týrnır ótti. Ony ótkizýge Qazaqstan Respýblıkasy Bılıard sporty federasııasy Shyǵys Qazaqstan oblystyq fılıalynyń dırektory Serik Aqtanov muryndyq boldy. Reti kelgende aıta ketý kerek, sport dese ishken asyn jerge qoıatyn isker azamattyń bastamasymen О́skemende bılıardtan Azııanyń ashyq chempıonaty, jazýshy Qabdesh Jumadilovti eske alýǵa arnalǵan týrnır, birneshe halyqaralyq, oblystyq jarystar ótip, bılıard sportyn jandandyratyndar qatary arta tústi. Serik Qasymbekuly jetekshilik etetin federasııanyń músheleri Astana, Almaty, Shymkent, elimizdiń basqa da qalalarynda ótetin jarystardyń kórigin qyzdyryp, júldeli oryndardy ıelenip júr.
Túsiphan Túsipbekovtiń týrnırine 23 tastaıaq sheberi qatysty. Olardyń arasynda Túsiphannyń dostary, zamandastary, bılıard sportyn nasıhattaýshy ardagerler boldy. Almatydan Túsiphannyń dosy, Jazýshylar odaǵynyń basqarma tóraǵasy Ulyqbek Esdáýlet, Astanadan memleket jáne qoǵam qaıratkeri, el sportynyń damýyna eleýli úles qosyp júrgen Sádibek Túgel, oblystyq drama teatrynyń dırektory Rýslan Qaıyrsynov, mereıtoı ıesiniń kindik qany tamǵan Tarbaǵataıdan delegasııany basqaryp kelgen aýdandyq ishki saıasat bóliminiń basshysy Ermek Qurmanǵalıev, taǵy basqa azamattar aqjarma tilekterin aıtyp, ata saltymen mereıtoı ıesiniń ıyǵyna shapan japty.
Oblystyq tótenshe jaǵdaılar basqarmasynda uzaq jyl basshy bolǵan polkovnık Almas Ýálıev qazir de babynda ekenin dáleldedi. Bılıardpen uzaq jyl shuǵyldanyp júrgen ol sheberligin pash etip, chempıon atandy. Nıkolaı Ryjıh, Qaırat Ádilbekov, Badrı Djebesov júldeli oryndardy bólisti. Olarǵa federasııa basshysy Qurmet gramotalaryn tapsyrdy. Astana men Almatydan, aýdandardan kelgen qonaqtar taǵylymy mol týrnırdi ótkizgen azamattarǵa alǵysyn aıtty. Al mereıtoı ıesi aldaǵy ýaqytta da bılıard sportyn damytýǵa úles qosa beretinin jetkizdi.
Ońdasyn ELÝBAI,
Qazaqstannyń qurmetti sport qaıratkeri
О́skemen