Atyraý oblysynda byltyrdan beri «Teńiz» ken ornynan jumysshylar bosatylyp jatyr. Sebep – jalpy quny 45 mlrd dollardy quraǵan keleshek keńeıý jáne uńǵy erneýindegi qysymdy basqarý jobalaryn iske asyrýdyń sońǵy mejesine jaqyndaýy.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, «Teńizden» bosatylǵandardyń arasynda tek Qazaqstanda ǵana emes, shetelderdegi kompanııalarda jumys isteýge nıet bildirgender bar. Máselen, 10 adam Reseı Federasııasyndaǵy «Tatneft» kompanııasyna jumysqa ornalasqan. Al «Velesstroı» kompanııasy bilikti mamandardy Reseıge, «Shlıýmberje Lodjelko» jumysshylardy О́zbekstan Respýblıkasyna jumys isteýge jibergen.
Árıne shetelge baryp, mamandyǵyna sáıkes jumys tabý ońaı emes. Desek te, irgedegi kórshiles elderge emes, ushqan qustyń qanaty talatyn alystaǵy Ýrýgvaıǵa kásibinen násip tabýǵa barǵan atyraýlyqtar az emes. Solardyń biri – Aımurat Aldońǵaruly.
Onyń mamandyǵy – oqshaýlaýshy. Bir qaraǵanda, bul qatardaǵy kóp mamandyqtyń biri sanalady. Biraq iri jobalarǵa osy kásipti meńgergender aýadaı qajet-aq. Dál osy mamandyqty jetik meńgergen Aımurat Aldońǵaruly buryn birneshe jyl «Teńiz» ken ornynda jumys istegen. Alaıda jobanyń aıaqtalýyna baılanysty jumystan bosatylǵan. Biraq óz isiniń qyr-syryn biletin maman qol qýsyryp otyrmaı, jan-jaqtan jumys izdeı bastaǵan. Tipti sheteldegi tanystarymen baılanys ornatqan.
– Ýrýgvaı elindegi Dýrasno qalasynyń mańynda jańa zaýyttyń qurylysy júrip jatyr. Sol zaýyttyń qurylysynda oqshaýlaýshy mamandyǵymen jumys istep júrgen tanystarym bar. Solar arqyly jańa zaýyt qurylysyn júrgizip jatqan kompanııaǵa túıindeme jibergen edim. Kóp ýaqyt ótpeı, kompanııadan jumysqa shaqyrtý keldi. Muny ózime berilgen múmkindik retinde qarastyryp, kóp oılanbastan, Ýrýgvaıǵa barýǵa jınaldym. О́ıtkeni kompanııa maǵan senim artyp otyr. Buǵan «Teńiz» ken ornynda jınaǵan tájirıbemniń septigi tıgenin jasyrmaımyn. Jol bıleti men qujattardy retteýge jumsalǵan shyǵyndy kompanııa kóterip aldy, – deıdi Aımurat Aldońǵaruly.
Qazir onymen birge lıtvalyqtar, shvedter jumys isteıdi. Sheteldegi jumysynyń «Teńiz» kenishindegi jobadan aıyrmashylyǵy kóp. Buryn «Teńizde» túski úziliske beriletin ýaqyt uzaqtaý bolǵan. Tipti arasynda shaı ishýge ruqsat beriletin. Al Dýrasno qalasyndaǵy zaýyt qurylysynda talap dál mundaı emes. Munda túski as ishý jarty saǵatqa ǵana sozylady.
– Qazaqstan men Ýrýgvaıdyń klımatyn salystyrý múmkin emes. Qazir Dýrasno qalasynda kún ystyq bolyp tur. Soǵan qaramastan, munda kúnine 10 saǵat jumys isteýge týra keledi. Shetelde jumys istegendikten, jalaqyda da aıyrmashylyq bar. «Teńiz» ken ornyndaǵy jobada jınaǵan tájirıbemniń paıdasyn, ásirese eńbek qaýipsizdigi jóninde alǵan bilimniń jemisin kórip júrmin, deıdi ol.
Únemi alǵa umtylyp, maqsatyna jetýdi kózdegen Aımurat Aldońǵaruly aldaǵy josparymen bólisti. Qazaqstanǵa naýryzda, ne mamyrda kelýdi josparlap otyrǵan kórinedi.
– Bizde qarapaıym mamandyqty ıgergen qyz-jigitter óte kóp. Biraq sondaı mamandyq ıeleriniń kóbinde tek óz elimizde, múmkindik bolsa, «Teńiz», «Qashaǵan» sekildi jobalarda jumys isteý qajet degen túsinik qalyptasqan. Shet tilin bilseń, tańdaǵan mamandyǵyńdy jetik meńgerseń, ózge elde de jumys isteýge bolady. Teginde, izdengen adam alǵa qoıǵan maqsat-muratyna jetedi. Tańdaǵan mamandyǵymen jumys tabady. Sol sebepten, shetelge barýdan, jumysqa ornalasýdan tartynbaý kerek. О́ıtkeni el, jer kóresiń. Sol eldiń mádenıetine, tarıhyna qanyq bolasyń. Sheteldegi kompanııalarda jumys isteseń, tájirıbeń de tolyǵa túsedi. Osynyń bári adamnyń bir orynda turaqtap qalmaı, dúnıetanymyn keńeıtýine, alǵa jyljýyna yqpal etedi, – deıdi A.Aldońǵaruly.
Atyraý oblysy