Qurlyqtyq hokkeı lıgasynda (QHL) oınaıtyn elordanyń «Barysy» óz aıdynynda Mınskiniń «Dınamosynan» jeńilip, jarystyń pleı-off kezeńine shyǵý múmkindiginen aıyryldy.
Osylaısha, Andreı Skabelka shákirtteri QHL tarıhynda úshinshi márte «Gagarın kýboginiń» pleı-off kezeńine shyǵa almady. «Barys» oıynshylary buǵan deıin 2015/2016 jylǵy maýsymdy – toǵyzynshy, 2017/2018 jylǵy maýsymdy 10-orynmen aıaqtap, úzdik segizdiktiń qatarynan tys qalǵan edi. Bıylǵy turaqty birinshilikte «Barys» hokkeıshileri 64 matchtan keıin 59 upaı jınap, «Shyǵys» konferensııasynyń sońynda keledi (11-oryn). Maýsymnyń aıaqtalýyna áli tórt týr bar. Biraq «Barys» úshin endi bul oıyndardyń esh mańyzy joq.
«Barys Arena» muz saraıynda Mınskiniń «Dınamosymen» ótken matchta «Barys» hokkeıshileri qarsylastarynan 5:2 esebimen jeńilip qaldy. Bul matchta qonaqtar sapynan Raıan Spýner men Roman Gorbýnov dýbldiń avtorlary atansa, Nık Merklı bir márte mergendigimen kózge tústi. Al aıdyn ıelerinen Nıkıta Mıhaılıs pen Lınden Veı dáldik tanytty.