Memleket basshysy Qasym-Jomart Toqaev Sırııalyq Arab Respýblıkasyna gýmanıtarlyq kómek jiberýdi tapsyrǵany da belgili. Osyǵan oraı jaqynda zilzaladan zardap shekken bul elge qajetti zattardyń alǵashqy legi jiberildi.
Sırııa halqyna qajetti birinshi kezektegi zattar Tótenshe jaǵdaılar mınıstrliginiń (TJM) memlekettik materıaldyq qorynan tasymaldanady. 50 tonna kólemindegi gýmanıtarlyq kómek azyq-túlik qaýipsizdigi jónindegi Islam yntymaqtastyq uıymy arqyly Aleppo qalasyna tórt reıspen 17-21 aqpan aralyǵynda jiberiledi.
Gýmanıtarlyq kómekti jóneltýdiń barysyn Tótenshe jaǵdaılar vıse-mınıstri Mereke Pshembaev qadaǵalady. TJM 28237 áskerı bóliminiń qyzmetkerleri Memlekettik materıaldyq qor komıtetiniń qoımasynan múlikterdi kólikterge tıep, Almaty qalasyndaǵy halyqaralyq áýejaıǵa jetkizdi. Barlyǵy 50 áskerı qyzmetshi men 5 tehnıkanyń kómegimen júk odan ári arnaıy ushaqqa tıeldi.
Gýmanıtarlyq júktiń quramynda konservilik azyq-túlikter, jyly kıimder, qysqy shatyrlar, kereýetter men tósek jaraqtary bar. Al Tótenshe jaǵdaılar mınıstrliginiń 28237 áskerı bóliminiń qyzmetshileri júktelgen mindetti tolyǵymen iske asyramyz dep otyr.