Kóp jyldan beri saılaýǵa salqynqandy qarap kelgen Soltústik Qazaqstan óńiriniń halqy bıyl saıası dodaǵa aıryqsha qyzyǵýshylyq tanytyp otyr. Tipti jaıshylyqta saıasatqa samarqaý qaraıtyn Qyzyljar óńiriniń halqy da bıyl sergek.
Bıyl bir mandattyq aýmaqtyq saılaý okrýgteri boıynsha ózin-ózi usynyp jatqandar da, saıası partııadan túsip jatqandar da kóp. Sonyń ishinde Soltústik Qazaqstan oblysynyń №24 bir mandattyq aýmaqtyq saılaý okrýginen Májilis depýtattyǵyna saılanýǵa 17 adam úmit bildirip otyr eken. Olardyń arasynda zańger de, ekonomıst te, jýrnalıst te, ınformatık te, aýyl sharýashylyǵy mamany da, munaıshy da, tipti deneshynyqtyrý muǵalimi de bar. Aýmaqtyq saılaý okrýginiń tóraǵasy Asqar Saqypkereevtiń aıtýyna qaraǵanda, ázirge sonyń úsheýi kandıdat retinde tirkelipti. Qalǵandary túrli tekseristerden ótip, jarnasyn tóleý ústinde.
Úmitkerlerdiń arasynda buryn Májilis depýtaty bolǵan, áriptesimiz Káribaı Musyrman, belgili saıasatker Asylbek Qojahmetov, «Áskerı ǵylymdar akademııasy» respýblıkalyq qoǵamdyq birlestiginiń prezıdenti Muhtar Serikpaev, «Qaraqamus-2020» JShS dırektory Orynbaı Atyǵaev sııaqty azamattar bar. Bulardyń sońǵy mekenjaıy Soltústik Qazaqstan oblysy bolmasa da bizdiń óńirden saılanýǵa úmitti. Kandıdattar tiziminde oblys ekonomıkasynyń damýyna belsendi atsalysyp júrgen sharýaqor, «Mambetov ı K» komandıttik seriktestiginiń bas dırektory Erkebulan Mambetov, «Soltústik Qazaqstan elektr júıesin bólý kompanııasy» AQ bas dırektory Anatolıı Kazanovskıı, «Atameken-Qyzyljar» mıkroqarjylyq uıymynyń dırektory Serik Ahmetbekov, «Gorgaz-Servız» JShS dırektory Oleg Ivanov, qoǵamdyq uıymdar arasynan «Qazaqstandaǵy orys qaýymdastyǵy» uıymynyń tóraǵasy Iýrıı Zaharov, «SQO boıynsha Adam quqyn qorǵaý jónindegi qoǵamdyq komıtettiń» tóraǵasy Sergeı Izmaılov, memlekettik qyzmet salasynan Eńbek jáne halyqty áleýmettik qoldaý departamentiniń dırektory Mereke Muhamedııarov sııaqty esimder atalady. Bir qyzyǵy, 17 adamnyń ishinde birde-bir áıel ózin usynbapty. Al aýyl turǵyndary arasynan «Májenov» sharýa qojalyǵynyń basshysy Baýyrjan Esmuqanov ózin-ózi usynǵan eken. Al ulttyq quramyna qarasaq, úmitkerler qatarynda 10 qazaq, bes orys, bir polıak, bir grýzın bar eken.
Soltústik Qazaqstan oblysy