Indýstrııa jáne ınfraqurylymdyq damý mınıstri Marat Qarabaev Máskeýge jumys sapary aıasynda Reseı Federasııasynyń úkimet tóraǵasynyń orynbasary – RF О́nerkásip jáne saýda mınıstri Denıs Mantýrovpen, sondaı-aq 25-ke jýyq óńdeý ónerkásibi kásiporyndarynyń ókilderimen kezdesti, dep habarlaıdy Egemen.kz.
Kezdesý barysynda taraptar jeńil ónerkásipti damytý jáne qurylys materıaldaryn óndirý máselelerin, sonymen birge hımııa ónerkásibi úshin mamandar daıarlaý boıynsha ózekti suraqtardy talqylady. Osy rette ónerkásip salasyndaǵy yntymaqtastyq Qazaqstan men Reseıdiń arasyndaǵy ekijaqty qatynastardyń negizgi baǵyty ekenin aıta ketken jón.
«Ekijaqty áriptestigimizdiń baǵyttary arasynda ónerkásiptik kooperasııanyń alar orny erekshe. Qazir 26 birlesken joba sátti iske asyrylyp, taǵy da 7 myńnan astam jumys ornyn ashýdy kózdeıtin 23 iri joba júzege asyrylyp jatqanyn aıta ketý kerek», dedi QR IIDM basshysy.
Bul rette 2022 jyldyń shildesinde Qazaqstan Ekaterınbýrgtegi «Innoprom-2022» halyqaralyq ónerkásiptik kórmesinde áriptes memleket retinde tabysty óner kórsetkenin aıta ketken oryndy. Nátıjesinde iskerlik qarym-qatynasty joǵary deńgeıge arttyrýǵa baǵyttalǵan birlesken is-qımyl baǵdarlamalary men 27 ekijaqty sharttarǵa qol qoıyldy.
Vedomstvo basshysy Marat Qarabaev bıyl otandyq ónerkásip kásiporyndary Ekaterınbýrg qalasynda ótetin «INNOPROM» halyqaralyq kórmesine qatysatynyn atap ótti. Sonymen qatar osy jyldyń qyrkúıeginde Astanada Memleket basshysynyń, sondaı-aq EAEO, Pákistan, Túrkııa, Úndistan, Iran, Ázirbaıjan jáne basqa da elderdiń ulttyq ekspozısııalary men jekelegen kompanııalarynyń qatysýymen «INNOPROM Qazaqstan» kóshpeli ónerkásiptik kórmesin ótkizý josparlanyp otyr.
Eske salaıyq, Máskeýge jasaǵan jumys sapary barysynda Marat Qarabaev kórshiles memlekettiń Qurylys jáne turǵyn úı-kommýnaldyq sharýashylyq jónindegi mınıstri Irek Faızýllınmen, RF Kólik mınıstri Vıtalıı Savelevpen jáne Reseı Federasııasynyń Energetıka mınıstri Nıkolaı Shýlgınovpen kezdesti.
Atalǵan kezdesýlerde sáýlet, qala qurylysy jáne tutastaı qurylys salasyn damytý, bıtým jetkizý máseleleri, sondaı-aq júk ári jolaýshylar avtotasymaly baǵytyndaǵy ekijaqty úkimetaralyq kelisim jobasyn daıyndaý máseleleri qaralǵan.