Premer-mınıstrdiń orynbasary Altaı Kólginov bilim berý uıymdarynda qaýipsizdikti qamtamasyz etý máselesi boıynsha keńes ótkizdi. Oǵan mınıstrlerdiń jáne oblystardyń, Astana, Almaty, Shymkent qalalary ákimderiniń orynbasarlary qatysty, dep habarlaıdy Egemen.kz Úkimetke silteme jasap.
QR oqý-aǵartý birinshi vıse-mınıstri Sholpan Karınova bilim berý uıymdarynda qaýipsizdikti qamtamasyz etý jónindegi jaǵdaı týraly, 2022 jyly bilim berý nysandaryn terrorızmge qarsy qorǵaý nusqaýlyǵy týraly, bilim berý uıymdarynda paıdalaný úshin shektelgen tyıym salynǵan zattardyń tizimin bekitý jóninde baıandady. Mysaly, Almaty, Qostanaı, Túrkistan oblystarynda, Ulytaý, Jetisý, Abaı oblystarynda beınebaqylaý júıesi joq.
Soltústik Qazaqstan, Qostanaı, Túrkistan oblystarynyń iri qalalarynda mamandandyrylǵan kúzet qyzmetimen kelisimshart jasalmaǵan. Barlyq oqý oryndary qaýipsizdiktiń keshendi júıesimen qamtamasyz etilýi tekseriledi.
Sondaı-aq Oqý-aǵartý mınıstrligi balalardy zorlyq-zombylyqtan qorǵaý, sýısıdtiń aldyn alý jáne balalardyń quqyqtaryn qamtamasyz etý, onyń ishinde Qaýipsizdik júıesin uıymdastyrý jónindegi keshendi jospardyń jobasyn ázirleýde. Oǵan 20-ǵa jýyq memlekettik organ men óńirler jumyldyrylǵan. Negizgi másele qaýipsizdik salasyndaǵy qyzmetterdi satyp alý úshin jergilikti ákimdikterden qarjylandyrýdyń azdyǵy.
Ishki ister mınıstriniń orynbasary Igor Lepeha bilim berý uıymdarynda qaýipsizdikti qamtamasyz etý jónindegi ishki ister organdarynyń jumysy jáne laýazymdy tulǵalardyń kúzet qyzmeti men jaýapkershiligine qoıylatyn talaptardy kúsheıtý jónindegi sharalar týraly habarlady. Petropavl qalasyndaǵy №4 orta mektepte bolǵan oqıǵaǵa qatysty tekserý barysynda nysanda týrnıket pen mamandandyrylǵan kúzettiń joqtyǵy anyqtalǵanyn atap ótti. 15 mekteppen beınebaqylaý júıelerin jedel basqarý ortalyqtaryna qosý týraly sharttar jasalǵan. Onyń ishinde №4 OM sharty 31.12.2022 jyly aıaqtalǵany anyqtaldy. Qarajat bólingenimen, mektepter kelisimsharttar jasamaǵan. Qazirgi ýaqytta laýazymdy tulǵalardyń jaýapkershiligi qarastyrylýda.
Vıse-premer Altaı Kólginov oqýshylardyń qaýipsizdigin qamtamasyz etý máselesiniń ózektiligin atap ótti.
«Bilim berý uıymdarynda tehnıkalyq jaraqtandyrý jáne lısenzııalanǵan kúzet máseleleri boıynsha jergilikti atqarýshy organdardyń jumysynda aıtarlyqtaı kemshilikter men olqylyqtar bar. Munyń barlyǵyn kelesi oqý jylynyń basyna deıin túzetý qajet. Bilim berý uıymdarynda qaýipsizdikti qamtamasyz etý boıynsha sharalar qabyldanbaǵan jaǵdaıda qatań jaýapkershilikke tartatyn bolamyz», dedi Altaı Kólginov.
Keńes qorytyndysy boıynsha jaýapty memlekettik organdarǵa oqý jyly bastalǵanǵa deıin bilim berý uıymdaryn dabyl túımelerimen, týrnıkettermen, lısenzııalanǵan kúzetpen jaraqtandyrý jáne ishki ister organdarynyń jedel basqarý ortalyqtaryna qosylǵan beınebaqylaý júıelerin ornatý jumystaryn aıaqtaý tapsyryldy. QR Oqý-aǵartý mınıstrligi Balalardy qorǵaý jónindegi keshendi jospardyń jobasyna psıhologııalyq qyzmetterdiń, olardyń kadrlyq quramynyń jáne t. b. qyzmetin kúsheıtý máselelerin engizýi kerek. QR IIM QR TJM-men birlesip bilim berý uıymdarynda qaýipsizdik talaptaryn saqtaý boıynsha monıtorıng júrgizýge tıis.