Elordadaǵy «Qazaqstan» jeńil atletıka kesheninde Ulttyq ǵylymı praktıkalyq dene tárbıesi ortalyǵynyń uıymdastyrýymen «Sport ǵylymy negizinde oqytý ádisteri» atty halyqaralyq semınar uıymdastyryldy. Eki kúnge jalǵasqan sabaqta Japonııanyń Iokogama Toın ýnıversıteti Sport ǵylymdary joǵary mektebiniń professory Tomonobý Sakýraı elimizdiń ár oblysy men qalasynan kelgen jattyqtyrýshylarǵa, nusqaýshylarǵa, ádiskerler men dene shynyqtyrý pedagogterine dáris oqydy.
«Sportqa ǵylymı kózqaras, ǵylymı taldaýlar men zertteýlerdi japonııalyq ǵalymdardan úırenýdi durys dep esepteımin. Osy baǵytta elimizdegi dene shynyqtyrý jáne sport salasy mamandary úshin qundy bilim kózi bolady degen nıetpen Tomonobý Sakýraıdy Astanaǵa shaqyrtyp otyrmyz», dedi Ulttyq ǵylymı praktıkalyq dene tárbıesi ortalyǵynyń bas dırektory Saǵdat Sadyqov.
Japonııa sportshylarynyń halyqaralyq jarystarda joǵary jetistikke jetýine óz úlesin qosyp júrgen Tomonobý Sakýraı – Iokogama Toın ýnıversıteti Sport ǵylymdary joǵary mektebiniń professory, Dene shynyqtyrý jáne sport salasyndaǵy ǵylymı-zertteýler jónindegi Japonııa qoǵamynyń dırektory, Japonııanyń fızıologııalyq qoǵamy jáne Japonııa dene shynyqtyrý jáne sport medısınasy qoǵamy keńesiniń múshesi, Dene shynyqtyrý jáne sportqa arnalǵan oqytý ǵylymy jýrnalynyń bas redaktory.
Áıgili ǵalym semınaryna qatysqan 100-ge jýyq sala mamanyna balalarǵa qalaı dene shynyqtyrýmen durys shuǵyldanýdy úıretýge jáne qyzyqtyrýǵa bolatynyn ǵylymı-zertteýleri arqyly jetkizdi. Sondaı-aq ol balalardyń dene fızıologııasynyń damýyna qaraı qandaı jattyǵýlarǵa mán berý keregin mysalmen túsindirdi. Bul qatarda ár sport túrindegi Olımpıada jáne álem chempıondaryna júrgizilgen zertteýler bar.
«Dene shynyqtyrý pánine kelgende ǵylymı baza bolsa, tárbıe jumysyn júrgizý ońaı. Jalpy, sportty damytýdyń da basty joly osynda jatyr. Qazir sport pen ǵylym jyldam damyp jatqanyn bilemiz. Meniń qazirgi zertteýlerim men statıstıkam eki Olımpıada arasyn qamtıdy. Bul joba meniń 4-5 jyl boıǵy eńbegim deýge bolady. Dese de, dene shynyqtyrýǵa kelgende negizgi zertteý ózgermeıdi», deıdi japonııalyq ǵalym.
Taǵylymy mol semınarǵa qatysyp, dene shynyqtyrý salasyndaǵy bilimin tolyqtyrǵan Oral qalasy bilim berý bóliminiń dene shynyqtyrý pánderi ádiskeri Taras Qýanǵalıev Japonııa sııaqty sportty ǵylymı turǵydan damytqan elderdiń tájirıbesine qanyqsam degen oıy oryndalǵanyn aıtady.
«30 jylǵa jýyq jeke ózimniń is-tájirıbemde qoldanyp alaıda ǵylymı turǵydan dálelin bilgim kelip júrgen birshama tehnıkalar japondyq professordyń aýzynan tolyqtaı rastalǵanda ózim shynymen qýandym. Sebebi bul tehnıkalar keńestik ádistememen bilim alǵan bizderge múldem kereǵar edi. Jalpy, japondyq ádistemeler keńestik ádistemeden birshama bólek, tipti keıbir nárseler qarama-qaıshy ekendigine kóz jetkizdim», dedi ol.
Eki kúnge sozylǵan respýblıkalyq semınar Sportty damytý dıreksııasynyń dırektory Oralbaı Jaqsymbetovtiń qoldaýymen ótkenin atap kórsetken jón.