ASTANA. 20 maýsym. Búgin túnde Italııa – Kosta-Rıka kezdesýimen D tobyndaǵy ekinshi týr oıyndary aıaqtaldy. Onda kostarıkalyqtar 1:0 esebimen jeńiske jetti. Bul týraly egeven.kz habarlady.
Italııa – Kosta-Rıka 0:1 (0:1).
20 maýsym. Resıfı. «Arena Pernambýký» stadıony. Tóreshi - Enrıke Osses (Chılı).
Italııa: Djanlýıdjı Býffon, Matteo Darmıan, Andrea Bardzalı, Djordjı Kellını, Inıasıo Abate, Antonıo Kandreva (Lorenso Insıne, 57), Andrea Pırlo, Danıele de Rossı, Tıago Motta (Antonıo Kassano, 46), Klaýdıo Markızıo (Alessıo Cherchı, 69), Marıo Balotellı.
Kosta-Rıka: Keılor Navas, Krıstıan Gamboa, Oskar Dýarte, Mıhael Ýmana, Djankarlo Gonsales, Jýnıor Dıas, Elsın Teheda (Hose Kýbero, 68), Krıstıan Bolanos, Joel Kempbell (Markos Ýrenıa, 74).
Gol: Braıan Rýıs (44).
Eskertýler: Marıo Balotellı (69) – Hose Kýbero (71).
Chempıonat bastalar aldynda jankúıerler «ólimge bas tikkender toby» degen ádil at bergen D kvartetinde favorıt Italııa da, Anglııa da, Ýrýgvaı de emes, Kosta-Rıka bolady dep kim oılaǵan! Kerisinshe jurttyń bári anyq aýtsaıder statýsyn osy quramaǵa telip qoıǵan jo pa edi?! Al Ortalyq Amerıkanyń jasaǵy Ýrýgvaıdan keıin Italııany da utyp ketip, Brazılııa chempıonatyndaǵy ázirge eń basty sensasııany jasap otyr. Eki birdeı burynǵy álem chempıonyn tize búktirgen ujym osylaı eki oıynda múmkin bolǵan 6 upaıdy túgel alyp, toptyń eń aldyna shyǵyp, kelesi pleı-off kezeńine birinshi bolyp ótti.
Eń bastysy, Kosta-Rıka osynyń aldyndaǵy sııaqty Italııamen kezdesýde de laıyqty jeńiske jetti. Shyny kerek, Chezare Prandellıdiń shákirtteri «los tıkostan» tıtteı basym bolmady. Ras, ıtalııalyq Marıo Balotellı komandalasy Andrea Pırlo bergen eki keremet pas arqyly gol soǵýy kerek edi. Biraq bul múmkindikterdi ol durys paıdalana almady. Appenın jigitteriniń osylardan basqa gol soǵýǵa qolaıly sátteri bolǵan joq.
Taımnyń sońynda kostarıkalyqtar aıtarlyqtaı basymdylyq kórsetti. Sol shabýyldar leginde chılılik tóreshi Enrıke Osses ıtalıandardyń Joel Kempbelldi óz aıyp alańdarynda anyq shalyp qulatqanyna penaltı berýge batyldyq tanyta almady. Degenmen, arada bir mınýt ótkende ádildik saltanat qurǵandaı boldy – amerıkalyqtar Braıan Rýıstiń kómegimen gol soǵyp, alǵa shyqty.
Osydan keıin Italııa quramasy ekinshi taımda oıyn tizginin birjola qolyna alatyndaı kóringen. Alaıda, is júzinde bári basqasha shyqty. Kostarıkalyq qaqpashy Keılor Navastyń darbazasyna tóngen qaýiptiń qatary birinshi taımdaǵydan da azaıyp ketti. Al «los tıkos» sát saıyn alǵa umtylyp, qarsy shabýyldar uıymdastyrýlaryn jalǵastyra berdi. Olar keıde kádimgideı qaýyrt shyqty. Osy aralyqta skýadýra adzýra ofsaıdqa túsip qalýlaryn jıiletti. Osylaısha qarsy jaqtyń ekpinin basyp otyrǵan Horhe Lýıs Pıntonyń jigitteri jeńisti jarııa etetin esepti kezdesý sońyna deıin saqtap qaldy.
Damır Qojamqul.
Derekkóz: egemen.kz.
Foto: Sportbox.ru.