Jýyrda elordadaǵy Ulttyq akademııalyq kitaphanada jazýshy Ámirjan Álpeıisovtiń «Jas tulparlar dúbiri» atty shyǵarmashylyq keshi ótti.
Mádenıet mınıstrliginiń uıymdastyrýymen ótken kesh «Azattyq ańsaǵan Saryarqa» atty derekti fılmmen ashylyp, qalamger shyǵarmashylyǵy qamtylǵan beınekórinis usynyldy.
Sharaǵa Astananyń zııaly qaýym ókilderi, L.N.Gýmılev atyndaǵy EUÝ-diń oqytýshylary, Aqmola oblysy ishki ister departamentiniń tyńdaýshylary, t.b. qatysty. Kesh barysynda Memleket tarıhy ınstıtýty dırektory, tarıh ǵylymdarynyń doktory, Búrkitbaı Aıaǵan, QR eńbek sińirgen qaıratkeri Sabyr Qasymov, L.N.Gýmılev atyndaǵy Eýrazııa ulttyq ýnıversıtetiniń kafedra meńgerýshisi Ǵadilbek Shalahmetov jınaqqa oń baǵa berip, avtor shyǵarmashylyǵyna tabys tiledi.
Kórsetilim arqyly «Muhtar Áýezov» qorynyń prezıdenti Murat Áýezovtiń jazýshy eńbekteri týraly aıtqan syrlaryna qanyqtyq. «Biz táýelsizdik týraly kóp aıtamyz. Al endi «Bizdiń elimizde sol táýelsizdikke umtylǵan qandaı qozǵalystar men kúshter boldy?» degen saýalǵa osy kitap tolyǵymen jaýap bere alady», – dedi Murat Muhtaruly ótken kezeńderdi keıingi jastarǵa ónege ete berý kerektigin megzep. Sh.Ýálıhanov atyndaǵy Tarıh jáne etnologııa ınstıtýtynyń dırektory, professor Hangeldi Ábjanov el egemendiginiń tarıhı belesterine toqtala kelip: «Azattyq degen nárse bar-joǵy bir-eki adamnyń qaıratkerligimen, kúreskerligimen kele salmaıdy. Táýelsizdik degenimiz búkil halyqtyń, kóptiń, eldiń birtutas eńbeginiń arqasynda nyǵaıatyn baılyq» degen tujyrymdy alǵa tartty.
Shara sońynda jazýshy Ámirjan Álpeıisov: «Qazir adam óziniń búgini men erteńin qatar oılanýǵa tıis. Bolashaqtyń negizi búgingi is-áreketińnen qalanady», – deı kelip, oqyrman qaýymǵa óz atynan zor alǵys bildirdi.
Maqpal TО́REBEK.
ASTANA.