Ázerbaıjannyń bas shahary – Bakýde batýttaǵy gımnastıkadan Álem kýboginiń alǵashqy kezeńi óz máresine jetti. Dúnıe júziniń 16 elinen kelgen 60 gımnast sheberlik baıqasqan jarysta Qazaqstan quramasynyń ókilderi baq synady.
Jyldaǵy dástúr boıynsha Bakýden bastaý alǵan Álem kýboginiń birinshi kezeńi jerlesterimiz úshin óte sátti ótti. Kaspıı teńiziniń jaǵalaýynda jalaýy jelbiregen dodada Qazaqstan sportshylary eki altyn medal jeńip aldy. Aldymen jekeleı synda jarys jolyna shyqqan otandasymyz Danıl Musabaev 59,240 upaı jınap, Álem kýboginiń jeńimpazy atandy. D.Musabaev byltyr dál osy Bakýde ótken básekede qola júldeni qanaǵat tutqan bolatyn. Ispanııalyq Horhe Martın (58,530) men fransııalyq Allan Morante (58,270) ekinshi jáne úshinshi oryndardy ózara bólisti.
Sondaı-aq juptyq saıysta baq synaǵan Danıl Musabaev pen Pırmammad Alıev sınhrondy sekirýde tuǵyrdyń eń bıik satysynan kórinip, Baký tórinde Ánuranymyzdy shyrqatty. Olar fınalda 51,940 upaı jınady. Bul synda kúmis júldege germanııalyq sportshylar (51,080 upaı) qol jetkizse, portýgalııalyqtar (50,730) úzdik úshtikti túıindedi. Osylaısha, Qazaqstan quramasy Álem kýbogi kezeńinde 2 altyn júlde ıelendi.