Elordada JRVI jáne tumaý juqtyrǵan turǵyndardyń kóbeıgeni baıqalady. Aýa raıynyń qolaısyzdyǵynan órshıtin syrqattyń sımptomdary jaıynda bilesiz be? Jýyrda №3 kópsalaly qalalyq aýrýhananyń ınfeksıonıst dárigeri Dınagúl Baeshova baspasóz máslıhatynda osy taqyryp tóńireginde keńinen baıandady.
Mamannyń aıtýynsha, elordada JRVI juqtyrǵandardyń ishinde 80-ge jýyq bala bar. Onyń ishinde 6 pasıent – reanımasııa bóliminde.
– Biz qala turǵyndaryna balalar arasynda juqpaly aýrýlardyń bolatyny týraly eskertkimiz keledi. Elordada qys uzaq. Qazirgi juqpaly aýrýlardyń, sonyń ishinde JRVI men tumaý ınfeksııasy órship tur. JRVI 200-den astam túrdegi vırýstan týyndaıdy. Keıbir jaǵdaılarda qozdyrǵyshtardyń birneshe túri bir ýaqytta juǵýy múmkin. Iаǵnı bul túrli ınfeksııalardy, sonyń ishinde tumaýdy jáne koronavırýsty da qamtıdy. Sýyq tııý negizi muryn joldaryna áser etetin jeńil aǵymdy JRVI-di bildiredi, – dep túsindirdi spıker.
JRVI-diń ártúrli qozdyrǵyshtarynan azdy-kópti belgiler baıqalýy múmkin. Mysaly, dene qyzýynyń joǵarylaýy, qaltyraý, álsizdik, bas aýrýy jáne basqa da belgiler. Al klınıkalyq jaǵdaıda JRVI jedel rınıt, farıngıt, tonzıllıt, larıngotraheıt jáne bronhıt túrinde kezdesýi múmkin. Kóp jaǵdaıda respıratorlyq vırýstyq ınfeksııalar jeńil aýrý túrinde júredi jáne ózdiginen ótedi. О́ıtkeni ımmýndyq júıe aǵzany vırýstan ózdiginen tazartady eken. Eger aýrý asqynǵan jaǵdaıda vırýstar tómengi tynys joldaryna enip, bronhıtten basqa ınfeksııa vırýstyq pnevmonııaǵa jáne jedel respıratorlyq dıstress sındromyna ákelýi de ǵajap emes.
Vırýstyq respıratorlyq ınfeksııalar sozylmaly aýrýlardyń órshýine áser etýi múmkin. Sımptomdar vırýsqa, sozylmaly aýrýlardyń bolýyna jáne buryn jasalǵan vaksınalaýǵa baılanysty ózgerýi de yqtımal. Mundaı jaǵdaıda vırýs juqtyrǵandar ózin álsiz sezinip, qaltyraý, bezgek, túshkirý, murynnyń bitelýi, sınýstyń bitelýi, tamaq aýrýy, daýystyń qarlyǵýy, jótel, bas aýrýy, bulshyqet aýrýy, qulaq aýrýy, kózdiń qyzarýy (konıýnktıvıt kezinde), febrıldi qurysý syndy sımptomdardan baıqalýy múmkin. Al joǵary tynys joldary ınfeksııalarynyń belgileri erte jáne kesh dep jikteledi. Erte sımptomdar ádette tez damyp, birer kúnge sozylady. Sol aralyqta bas aýrýy, túshkirý, qaltyraý, tamaq aýrýy basylmaı, álsizdik baıqalady. Sýyq tıgende jótel ádette túshkirýden keıin damıdy. Balǵyn balalarda kezdesetin febrıldi ustamalar óte sırek kezdesetin sımptom bolyp sanalady. Olar 6 aıdan 5 jasqa deıingi balalardyń 2-5%-ynda 38°C temperatýrada paıda bolýy múmkin. Sondyqtan aq halattylar aýrýdyń belgileri anyqtalsa, der kezinde dárigerge qaralyp, ýaqtyly emdelgen durys ekenin eskertedi.