Aqtóbe oblystyq tarıhı-ólketaný mýzeıinde qazaqtyń tuńǵysh kásibı basylymy «Qazaq» gazetiniń 110 jyldyǵyna arnalǵan tarıhı-tanymdyq is-shara ótti. Jınalǵandarǵa eń áýeli «Qazaq» gazetin jaryqqa shyǵarǵan A.Baıtursynuly men M.Dýlatuly bastaǵan qaıratkerlerimizdiń eńbegi týraly beınesıýjet kórsetildi. Sodan keıin kópshilik Táýelsizdik zalynda jasaqtalǵan «HH ǵasyrdyń birinshi shıregindegi turmystyq buıymdar» atty kórmeni tamashalady. Munda mýzeı qyzmetkerleri aýyl-aýyldan jınaqtaǵan, ótken ǵasyrdyń basynda el tutynǵan turmystyq buıymdar qoıyldy.
Mýzeı qyzmetkerleri muraǵat derekteri men aqsaqaldardan jınalǵan aýyzsha derekter negizinde «Qazaq» gazetiniń taralýyna yqpal etken aqtóbelikter týraly tyń málimetterdi ortaǵa saldy. Qundy derek – sol zamanda Orynbor, Qazan, Troısk, Sankt-Peterbýrgte oqyǵandar, aýqattylar men bolystardyń gazet taratý men baspahana shyǵyndaryna bergen járdemi týraly da aıtylyp ótti. «Qazaq» gazetiniń 110 jyldyǵyna arnalǵan is-sharany ótkizýge mektep oqýshylary da atsalysty. Aqtóbe qalasyndaǵy U.Qulymbetov atyndaǵy №64 orta mektep pen M.Aryn atyndaǵy Qarǵaly orta mektebiniń oqýshylary ázirlegen «Qazaq» gazeti – 1918 jyl» atty sahnalyq kórinis óte áserli shyqty.
Ulttyń joǵyn joqtaǵan basylym Orynbor qalasynda jaryq kórip, el ishindegi tilektes-nıettes azamattardyń kómegimen qazaq dalasynyń túkpir-túkpirine kidirissiz tarady. HH ǵasyrdyń alǵashqy onjyldyǵynda Aqtóbe qalasy men Orynbordyń arasyna otarba júre bastaǵanda, basylymnyń alǵashqy sandary nıettes jandardyń kómegimen elge jetetin. Bul týraly Qazaqstannyń Qurmetti jýrnalısi Idosh Asqar, ólketanýshy Bekarystan Myrzabaı, tarıh ǵylymdarynyń doktory, professor Uzaqbaı Ismaǵulov, oblystyq muraǵattyń jetekshi ǵylymı qyzmetkeri Dýman Sarbaev, fılosofııa ǵylymdarynyń kandıdaty Úmbethan Sársembın, qalalyq jas týrıster stansasynyń qosymsha bilim berý pedagogi Dılıara Ysqaq sóz sóılep, tarıhy taǵylymdy «Qazaq» gazetiniń elimizdiń baspasóz salasynda alar orny erekshe ekenin aıtyp, sharany uıymdastyrýshylarǵa alǵystaryn bildirdi.
Aqtóbe oblysy