Áýesqoı sportshylardyń muz aıdynynda júgirýden ekstremaldy jarysy ótti. Alǵash ret uıymdastyrylǵan halyqaralyq jarysqa AQSh, Reseı, Chehııa, Polsha, Aýǵanstannan jáne elimizdiń birqatar óńirinen 300-ge jýyq sportshy qatysyp, baq synasty.
Jarysqa qatysýshylar ushar basyna qazbaýyr bulttar baılanǵan Oqjetpeske, baýyry ádemi ańyzǵa tunyp turǵan Jumbaqtasqa, qoldyń salasyndaı máńgi jasyl qaraǵaılarǵa tańǵalysty. Appaq qar jamylǵan jolbarys jondy jotalar, shanshyla bitken shoqylar sulýlyqqa ińkár jandardy ajarymen arbap, kórkemdigimen tánti etip qol bulǵap ózine shaqyryp turǵandaı. Áýel bastaǵy asqaraly maqsat ta tabıǵaty kórkem kýrortty óńirdiń bolmys-bitimin nasıhattaý bolatyn.
Qatysýshylar birneshe qashyqtyqta baq synasty. Jeti shaqyrymdyq jarys jolynda almatylyq sportshy Tımýr Artıýhın jeńimpaz atansa, 14 shaqyrymdyq dodada Astanadan kelgen Vladımır Ekerttiń mártebesi ústem boldy. Eń qyzyǵy, 21 shaqyrymdyq qashyqtyq bolatyn. Munshalyqty uzaq jolǵa temirdeı tózimdi, daıyndyǵy minsiz sportshynyń ǵana qatysýy múmkin. Tartysty ótken dodada elordalyq sportshy Iýrıı Shvestiń baǵy jandy. Al jeti shaqyrymdyq qashyqtyqta ótken skandınavııalyq júriste kókshetaýlyq Qazbek Elýbaevqa teń keler eshkim bolmady.
– Dál osyndaı buqaralyq sport jarysyn uıymdastyrý buryn-sońdy bolǵan emes. Bizdiń kompanııamyzdyń qurylǵanyna bıyl 8 jyl tolǵaly otyr. Aldaǵy ýaqytta osyndaı qyzǵylyqty is-sharalardy kóbirek ótkizsek, ólkeniń óńin tanytyp, týrıstiń órisin keńeıtemiz, – deıdi «Býrabaı Damý» jaýapkershiligi shekteýli seriktestiginiń marketıng bóliminiń basshysy Shyńǵys Orazalın.
Nesi bar, Býrabaı baýraıynda baq synasqan sportshylar arqyly týǵan eldiń tamasha tabıǵaty shartarapqa málim bolatyn boldy. Ol da az dúnıe emes.
Aqmola oblysy,
Býrabaı aýdany