Adamzat balasynyń basyna tóngen Ekinshi dúnıejúzilik soǵys alapatynyń ashy zardaby áli de halyq jadynda. Búginde qıyn-qystaý zamannyń qasiretin eske alatyn ardagerler de azaıdy. Biraq biz, keıingi urpaq mıllıondaǵan adam taǵdyryn qyrshynnan qıǵan soǵysty, jaýmen jankeshtilikpen soǵysyp asqan erlik kórsetken ákelerimiz ben atalarymyzdy jadymyzdan shyǵarýǵa qaqymyz joq.
Erligimen elge tanylǵan Jaqsy aýdanyna qarasty Alǵabas aýylynyń týmasy – Keńes Odaǵynyń Batyry ataǵyna usynylǵan Qojamseıit Shaıahmetuly atamyzdyń maıdan dalasynda kórsetken erlikteri aıtýǵa turarlyq. Atamyz 1923 jyly 23 aqpan kúni Alǵabas aýylynda dúnıege kelgen. Jastaıynan jetim qalyp, balǵyn balalyq shaǵyn qıyndyqpen ótkizgen. 1942 jyldyń sáýir aıynda maıdanǵa attanyp Stalıngrad, Don, Ońtústik-Batys jáne 1-Belarýs maıdanynda Ýkraına, Moldova jáne Polsha jerlerin jaýdan azat etýge qatysqan. Soǵystyń alǵashqy kúnderi-aq jaýǵa degen óshpendiligin aıqyn kórsetip, asqan jaýapkershilikpen komandırdiń buıryǵyn múltiksiz oryndap batyldyǵymen, erligimen erekshe kózge túsedi. 1942 jyly «Erligi úshin» medalimen, 1943 jáne 1945 jyldary eki márte «Qyzyl Juldyz» jáne «Jaýyngerlik Qyzyl Tý», sondaı-aq qaharmandyǵy úshin birinshi dárejeli «Uly Otan soǵysy» ordenderimen marapattalǵan.
Alapat soǵysta Qojamseıit atamyz asqan erliktiń úlgisin kórsetedi. Sheshýshi aıqastan keıin kózsiz erligi elenip basshylyqtyń sheshimimen Keńes Odaǵynyń Batyry ataǵyna usynylady. Ashyq aqparat kózindegi derekke júginsek: «Shpree ózeninen ótý barysynda 1945 jyldyń 23 sáýir kúni gvardııa aǵa serjanty Qojamseıit Shaıahmetov aıryqsha erlik, tapqyrlyq pen eptilik tanytty. О́z ómirin aıamaı, jaýǵa oqty qarsha boratyp, «Otan úshin!», «Stalın úshin!» dep urandatyp, Shpree ózeniniń sol jaǵalaýyna jaıaý áskerdi ótkizýge járdemdesip, birneshe jaýdyń kózin joıyp, tehnıkasyn qıratyp, plasdarmdy keńeıtip, aýmaqty jaýdan tazartty. Berlın qalasynyń mańyndaǵy urys kezinde Shpree ózeni, Landver kanaly jáne qalanyń kóshe urystarynda gvardııa aǵa serjanty Qojamseıit Shaıahmetov bastaǵan jaýyngerler 3 nemis tankisin, 2 ózdiginen júretin tehnıkasyn, 4 bronetransporterin, áskerı júk tıelgen 10 avtokólikti, 5 PTO quraldaryn jáne 170-ke jýyq fashıstiń kózin joıdy. Jeke ózi 21 gıtlershildi, onyń ishinde 2 kapıtandy tutqynǵa aldy. Qojamseıit Shaıahmetov Keńes Odaǵynyń Batyry ataǵyna laıyq. 64-gvardııalyq OITPD GV gvardııa maıory A.Safonov. 1945 jyldyń 6 mamyry» dep jazylǵan. Biraq, ókinishke qaraı, jeńis kúnin jaqyndatýǵa osynshama erlik kórsetip, jan aıamaı arpalysqan batyr atamyzǵa Keńes Odaǵynyń Batyry altyn juldyzy «buıyrmaǵan».
Syrtqy ister mınıstrligi arqyly Máskeý qalasyndaǵy Qazaqstan elshiliginiń qoldaýymen Reseı memlekettik arhıvinen jáne Reseı Qorǵanys mınıstrligine suraý salǵan hatqa jaýap aldyq. Onda joǵarydaǵy erlik taıǵa tańba basqandaı kórsetilgen.
Qazaq eli egemendik alǵan soń, zaman talabyna saı óz eliniń batyrlary men ardagerleriniń abyroıyn asqaqtatý maqsatynda tyńǵylyqty ister atqaryp jatyr. Ekinshi dúnıejúzilik soǵys týraly aıtylmaı ketken aqıqattar aqparat quraldarynda jıi jazylyp, aıtylyp júr. Erlikteri eleýsiz, elenbeı qalǵan qanshama bozdaqtardyń aty-jónderin pash etip, keleshek urpaqqa amanat retinde jarııalaý – bizdiń paryzymyz. Alǵabas aýyly turǵyndary jáne Qojamseıit atamyzdyń urpaqtary atamyzdy batyr retinde maqtan tutamyz. Táýelsizdik alǵan odaqtas memleketter óz eliniń Ata Zańyna súıenip, óz eliniń batyry ataǵyn berip jatqanynan bárimiz de habardarmyz. Qojamseıit Shaıahmetuly atamyzdyń 100 jyldyq mereıtoıy qurmetine batyr rýhyna taǵzym retinde «Halyq Qaharmany» ataǵyna usynýdy el bolyp qoldaıyq.
Talǵat QURMANULY,
Astana qalasynyń turǵyny