Astana áýejaıy tez buzylatyn aýyl sharýashylyǵy jáne teńiz ónimderin, sondaı-aq farmasevtıkalyq ónimderdi jınaqtap taratatyn mýltımodaldi hab qurýǵa nıetti. Tipti oǵan avtomobılder men onyń bólshekteri de tartylatyn kórinedi.
Bastaýynan taratyp aıtar bolsaq, kásiporyn elorda áýe aılaǵy úshin atalǵan taýarlardy tıeýdi, jóneltýdi iske asyratyn bolady. Búginde el Prezıdentiniń tapsyrmalaryn oryndaý sheńberinde «Nursultan Nazarbaev halyqaralyq áýejaıy» AQ tranzıttik áleýetti jáne júk tasymalyn damytý jónindegi jumystardy jalǵastyryp jatyr.
2020 jyly kásiporyn óz qyzmetiniń strategııalyq damý josparyn túzetip, áýe kemelerine qyzmet kórsetý jáne janarmaı quıý úshin Qazaqstan astanasyna sheteldik júk jáne tranzıttik reısterdi tartý jónindegi jumysty taǵy da jandandyra túsýdi qolǵa aldy. Nátıjesinde, 2021-2022 jyldary 4 myńǵa jýyq júk ushaqtarynyń tranzıttik reısine qyzmet kórsetildi.
Oǵan qosa, elorda áýejaıy birqatar iri júk avıakompanııasyna óz terrıtorııasynan oryn usynǵan. Búgingi tańda Astanada AeroTransCargo, ASL Airlines jáne Challenge Airlines ornalasqan. Sondaı-aq 2022 jyldyń aıaǵy men aǵymdaǵy jyldyń basynda Lej jáne Lıýksembýrg júk termınaldarynda tanysý kezdesýleri jáne Qazaqstanda Turkish Cargo, Air Belgium Cargo jáne Cargolux-pen tabysty kelissózder ótkizipti.
Astana júk termınalyn damytý boıynsha iri logıstıkalyq kompanııalarmen yntymaqtastyq jalǵasýda. 2022 jyly aýtsorsıngke aýystyrý sheńberinde ALS Logistics kompanııasymen kelisim jasalǵan. Ol aǵymdaǵy jyldan bastap qoldanystaǵy júk termınalyn 40 paıyzǵa keńeıtýge jáne aýdany 1800 sharshy metr jańa nysan turǵyzýǵa qarajat salýǵa mindettenedi.
Sóıtip, áýejaı aýmaǵynda qoımasy bar basqa júk operatorlarymen yntymaqtasady. Atap aıtqanda, e-commerce júkterine qyzmet kórsetý úshin jeke termınal qurý jospary da joq emes. «Qazposhta» men halyqaralyq poshta almasý pýnktin (MMPO) qurý týraly ýaǵdalastyqqa qol jetkizildi. Al joǵaryda aıtylǵandaı «SK-Farmasııamen» yntymaqtastyq sheńberinde áýejaı aýmaǵynda farmasevtıkalyq hab qurý kózdelip otyr.
Taǵy bir mańyzdy shara, ótken jyly áýejaıdy damytýdyń 2052 jylǵa deıingi bas jospary ázirlengen. Jańa strategııa temirjol, avtomobıl jáne áýe júk tasymaldaryn qosý úshin áýejaıǵa temirjol ınfraqurylymyn ákele otyryp, mýltımodaldi hab qurýdy kózdeıdi.
Mýltımodaldi hab elordalyq áýe aılaǵy úshin júkterdiń jańa túrlerin – tez buzylatyn aýyl sharýashylyǵy ónimderin, teńiz ónimderin, avtomobılder men avtomobıl bólshekterin, sondaı-aq halyq tutynatyn taýarlardy tartýǵa múmkindik beredi. Sondaı-aq Taıaý Shyǵys elderi men Qytaıǵa aýyl sharýashylyǵy ónimderiniń eksportyn damytý jónindegi jumys taǵy da jandanady.