Qaraǵandy aımaǵynda dala jumystaryna daıyndyq bastaldy. Bıyl dándi daqyldar 1,1 mln gektar jerge sebiledi. Budan bólek, kartop pen kókónis alqaby da ulǵaıady.
– 2023 jyly aýyl sharýashylyǵy daqyldarynyń kóktemgi egisi – 1 105,5 myń gektar. Bul ótken jylǵy deńgeıden 43,7 myń gektarǵa artyq. Dándi jáne dándi-burshaqty daqyldar – 957,2 myń gektarǵa, maıly daqyldar – 59 myń gektarǵa, jemshóp daqyldary 76,2 myń gektarǵa sebiledi. Aýyl sharýashylyǵy qurylymdarynda kartop salý 12 myń gektar aýmaqqa josparlanǵan. Bul ótken jylmen salystyrǵanda 526 gektarǵa, kókónis 1,7 myń gektarǵa artyq, deıdi aýyl sharýashylyǵy basqarmasynyń basshysy Asqar Sanaýbarov.
Basqarma basshysynyń aıtýynsha, tuqymǵa qatysty problema joq. Reprodýksııaly jáne elıtaly tuqymdar sińiriledi. Munyń syrtynda, mıneraldy tyńaıtqyshtardy da molynan qoldaný kózdelip otyr. Mamandardyń sózinshe, bul – jerdi utymdy paıdalanyp, ónimdilikti arttyrýǵa asa qajet qadam.
О́ńirde sýarmaly jerdiń kólemi de ulǵaıatynyn atap ótýge tıispiz. Tehnıkadan da másele týyndamaýǵa tıis. Basqarma jarııa etken derekterge júginsek, búginde egis naýqanyna 10 myńǵa jýyq traktor, 248 egis kesheni jáne 4774 sepkish saqadaı saı.
Janar-jaǵarmaıdan da tapshylyq kórmeıtinin aıtady quzyrly oryndar. Osy maqsatta arzandatylǵan dızelmen qamtamasyz etý durys jolǵa qoıylǵan. Kóktemgi egis jumystaryna fermerler «Keń dala» jeńildikti nesıe baǵdarlamasy boıynsha memlekettik qoldaýdy paıdalanady. Budan basqa, bıýdjetten sýbsıdııalar berýge, onyń ishinde, tuqym sharýashylyǵyn damytýǵa, pestısıdter men mıneraldy tyńaıtqyshtar satyp alýǵa qarajat bólindi.
Qaraǵandy dıqandary kóktemgi egiske mamyr aıynan bastap kirisemiz dep josparlap otyr.
Qaraǵandy oblysy