Senat depýtattary Asqar Shákirovtyń tóraǵalyq etýimen ótken Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «Áskerı polısııa organdary týraly» zańdy qarady.
Zańnyń negizgi maqsaty – áskerı polısııa organdarynyń qyzmetin jetildirý. Onda áskerı polısııa organdarynyń mindetteri men quzyretterin, qurylymy men ókilettikterin aıqyndaıtyn, sondaı-aq qazirgi kezde júzege asyp jatqan fýnksııalardy zańnamalyq bekitý jóninde ózgerister kórsetilgen.
Zań áskerı polısııa organdary qyzmetshileriniń dene kúshin, arnaıy quraldardy, qarýdy qoldanýyn, sondaı-aq olardyń jeke quramy men áleýmettik qamsyzdandyrý máselelerin retteıdi.
Jańa qujat áskerı polısııa organdaryna Qazaqstan Respýblıkasynyń zańnamasynda belgilengen quzyret sheginde Qarýly Kúshterde, basqa da áskerler men áskerı quralymdarda quqyqtyq tártipti qamtamasyz etý, quqyq buzýshylyqtardyń aldyn alý, eskertý, anyqtaý jáne jolyn kesý, sondaı-aq qamaýǵa alý, ákimshilik qamaýǵa alý jáne de áskerı qyzmetshilerdi qoǵamnan ýaqytsha oqshaýlaýdyń ózge de sharalary túrindegi jazany oryndaý boıynsha mindetterdi júkteıdi.
Sondaı-aq Senattyń Qarjy jáne bıýdjet komıtetiniń depýtattary keńeıtilgen otyrysta «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksine (Salyq kodeksi) jáne «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksin (Salyq kodeksi) qoldanysqa engizý týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zań jobasyn talqylady.
Zań jobasynda sotqa júginetin kezde boryshker adam úshin 0,3 AEK mólsherinde memlekettik baj mólsherlemesi belgilengen jáne jeke adamnyń tólem qabilettiligin qalpyna keltirý, sottan tys nemese sot arqyly bankrottyq rásimderin qoldaný úshin sotqa júgingen kezde ósimpuldy esepteýdi toqtata turý jáne sottyń teris sheshimi bolǵan kezde ony qaıta jańartý kózdelip otyr.
Qujatta sondaı-aq kámeletke tolmaǵandarǵa tólqujat bergeni úshin memlekettik bajdy 8 AEK-ten 4 AEK-ke deıin tómendetý usynylady. Zań jobasynda sonymen qatar memlekettik orman qory jerlerin jáne erekshe qorǵalatyn tabıǵı aýmaq jerlerin qospaǵanda, barlyq sanattaǵy jerdiń ósimdikter dúnıesin paıdalanǵany úshin tólemaqy engizý kózdeledi.
Zań jobalary Palatanyń qaraýyna jiberildi.