Qaýipti ýchaske kóp

Ertis ózeniniń Mırnyı kenti men Ippodrom aýmaǵyndaǵy tusynda muz jarý josparlanyp otyr. Búgingi tańda Ertistegi muzdyń qalyńdyǵy 62 sm bolsa, sý deńgeıi 211 sm.

– Jyl saıyn sý tasqyny qaýpi bar 15 ýchaskeden qar aldyn ala shy­ǵarylady. Osy kúnge deıin 380 myń sharshy metr qar shy­ǵa­ryldy. Semeı qalasy bo­ıyn­sha aryq júıesiniń uzyndyǵy 52 shaqyrymdy quraıdy. Aryq júıesin «Ze­lenstroı Se­meı» JShS tu­raqty tazalaıdy. Onda kún saıyn 25 adam jáne 5 bir­lik arnaıy tehnıka ju­myl­dyrylǵan, – deıdi Semeı qalasy Tótenshe jaǵ­daı­lar bas­qarmasy basshysynyń mindetin atqarýshy Álibek Tur­synhanov.

О́tken demalys kúnderi Se­meı qalasynyń ákimi Nurbol Nur­saǵatov ta sý basý qaýpi bar aýmaqtardy aralap, atqarylyp jatqan jumystardyń anyq-qanyǵyna kóz jetkizdi. Jo­ǵaryda aıtqan 15 ýchaskeniń ishinde Shyǵys kenti men Sogra aýdanyn sý basý qaýpi jo­ǵary bolyp tur. «Kóktemgi sý tasqynynyń aldyn alý úshin Semeı qalasynyń ákimdigi bó­getter salý týraly sheshim qa­byldady. Sogra aýmaǵynda 500 metrlik bóget salýdy bastadyq. Qazirgi ýaqytta 17 tehnıka ju­myldyrylyp, topyraq tasýda. Bóget arqyly Sogradaǵy 40-qa jýyq jer úıdi sý basýdan saqtaı alamyz. Qazirgi tańda kommýnaldyq qyzmetter ózen arnalaryn da tazalap jatyr. Sondaı-aq Shyǵys kentindegi saıajaılarǵa 700 metr bolatyn bóget salý josparda bar. Bógetterdi salýǵa qalalyq bıýdjetten 26 mln teńge qarajat qarastyryldy», deıdi qala ákimi N.Nursaǵatov.

Qalada qar sýynyń bó­getsiz aǵyp ketýi úshin káriz qudyq­tarynyń qaqpaqtaryn ashý jumystary da bastaldy. Semeı qalalyq jolaýshylar kóligi jáne avtomobıl joldary bóliminiń basshysy Medet Altaevtyń aıtýynsha, shahardyń 30 kóshesinde 500 sý qabyldaý qudyǵy or­nalasqan. Qala kóshelerin qardan tazalý úshin 80-nen astam tehnıka men 6 jumysshy brıgadasy jumyldyrylǵan. Sonymen qatar kóktemgi sý tasqyny ke­zeńiniń jaqyndaýyna baılanysty qalalyq kommýnaldyq qyzmetter kúsheıtilgen jumys rejimine aýystyryldy.