Reseıdiń «Sport Ekspress» basylymy Qurlyqtyq hokkeı lıgasynyń bıylǵy maýsymynda (QHL) eń kóp jalaqy alatyn hokkeıshilerdiń esimin jarııalady. Baı-qýatty sportshylardyń tizimin «Lokomotıv» pen «Avangard» klýbtarynyń shabýylshylary – Maksım Shalýnov pen Korben Naıt bastap tur. Eki hokkeıshi jylyna 90 mln rýbl (teńgege shaqqanda – 538 mln) kóleminde jalaqy alady eken. Bul – bonýs pen syıaqylaryn eseptemegendegi taza aılyq jalaqylary.
Sonymen qatar turaqty birinshilikte eń joǵary jalaqy alatyn TOP-10 hokkeıshiniń qatarynda Anton Býrdasov («Traktor»), Aleksandr Radýlov («Ak Bars»), Vladımır Edýardovıch Tkachıov («Avangard», úsheýiniń de jalaqysy – 80 mln rýbl (478 mln teńge), Dmıtrıı Iаshkın (SKA – 77 mln rýbl nemese 460 mln teńge), Stefan Da Kosta («Avangard»), Damır Jafıarov (SKA), Alekseı Marchenko («Lokomotıv»), Vladımır Aleksandrovıch Tkachıov («Traktor») jáne Vadım Shıpachev («Ak Bars», tórteýiniń de jalaqysy – 75 mln rýbl nemese 448 mln teńge) bar.
Reseılik basylym usynǵan jylyna eń kóp tabys tabatyn hokkeıshiler tiziminde Qazaqstan quramasynyń eki ókili bar eken. Olar – Máskeýdiń SSKA klýbynyń namysyn qorǵaıtyn qorǵaýshy Darren Dıs pen «Barys» komandasynyń shabýylshysy ári kapıtany Nıkıta Mıhaılıs. Keıingi eki jylda SSKA sapynda óner kórsetip, byltyr «Gagarın kýbogin» jeńip alǵan Dıstiń esepshotyna Máskeý komandasy jylyna 70 mln rýbl (418 mln teńge) aýdarady. Al elordanyń «Barysy» óziniń eń úzdik surmergenderiniń birine 50 mln rýbl (298 mln teńge) kóleminde jalaqy tóleıdi. Sondaı-aq astanalyq ujymnyń taǵy bir ókili, kanadalyq shabýylshy Lınden Veı de dál sondaı jalaqy alady.
Jylyna 20 mln rýblden (120 mln teńge) kóp jalaqy alatyn 245 hokkeıshiniń tizimine «Barys» klýby sapynda muzaıdynǵa shyǵatyn taǵy bes hokkeıshi engen. Atap aıtqanda, kanadalyq shabýylshy Maıkl Shapıý (26 mln rýbl nemese 155 mln teńge), slovakııalyq qaqpashy Iýlıýs Gýdachek pen amerıkalyq shabýylshy Entonı Lýıs (25 mln rýbl nemese 149 mln teńge), kanadalyq qorǵaýshy Djessı Grem (23 mln rýbl nemese 137 mln teńge) jáne amerıkalyq shabýylshy Djeremı Brakko (22 mln rýbl nemese 131 mln teńge).
Osy oraıda bıylǵy Qurlyqtyq hokkeı lıgasynyń «Shyǵys» konferensııasyndaǵy 66 oıynnyń tek 27-sinde ǵana jeńip, 61 upaımen kósh sońynda qalyp qoıǵan «Barys» klýbynyń oıynshylary óz jalaqylaryn adal alyp júr me degen suraq týyndaıdy. Ol úshin joǵaryda aty atalǵan hokkeıshilerdiń statıstıkasyna kóz júgirtip kóreıik.
Máselen, «Barys» quramyn bıylǵy maýsymda tolyqtyrǵan qaqpashy Iýlıýs Gýdachek kúni keshege deıin turaqty birinshilik aıasyndaǵy 42 matchqa qatysyp, óz qaqpasyna 93 shaıba ótkizip alǵan. Al Gýdachekten áldeqaıda az jalaqy alatyn Nıkıta Boıarkınniń qaqpasynan ózge hokkeıshiler 31 oıynda 65 márte sańylaý tapqan eken. Qaýipti soqqylardy qaıtarý (91.4 – 90,9) jáne senimdi oınaý (2.46 – 2,58) jaǵynan Boıarkınde azdaǵan basymdyq baıqalady.
Qorǵaýshy Djessı Grem 64 matchta muzaıdynǵa shyǵyp, birde-bir oıynda shaıba soǵa almaǵan. Dese de 19 goldyń soǵylýyna jaǵdaı jasaǵan. Áıtkenmen, nátıje kórsetý jaǵynan Qazaqstan hokkeıshisi Ádil Beketaev qorǵaýshylar arasynda kósh bastap tur. Ol 62 matchta úsh márte mergendigimen kózge túsip, 17 márte assıstenttik jasaǵan.
Shabýylshylar Nıkıta Mıhaılıs, Lınden Veı, Entonı Lýıs jáne Djeremı Brakko statıstıkalyq kórsetkish boıynsha bir-biriniń izin qýyp keledi. 56 matchta 18 shaıba soǵyp, áriptesterine 22 márte nátıjeli pas bergen Veı mergender kóshin bastap tur. Keıingi orynǵa D.Brakko jaıǵasqan. Ol 59 matchta 14 ret nysanany dál kózdep, 26 márte komandalastarynyń shaıba soǵýyna múmkindik jaratyp bergen. Nıkıta Mıhaılıs 56 oıynda 14 gol soǵyp, 24 márte dál pas berse, Lýıs 56 oıynda (9+21) 30 upaı jınaǵan.
Al jylyna 155 mln, aıyna 13 mln teńge shamasynda jalaqy alatyn Maıkl Shapıý bir maýsymda bar-joǵy 10 oıynǵa qatysyp, úsh márte mergendigimen kózge túsken eken.
Aıta keteıik, beıresmı derek boıynsha jylyna 10 mlrd teńge kóleminde qarjy bólinetin elordanyń «Barysy» Qurlyqtyq hokkeı lıgasynyń bıylǵy maýsymynda «Shyǵys» konferensııasynyń týrnır kestesinde eń sońǵy orynda qalyp qoıdy. QHL tarıhynda «Barys» buǵan deıin eshqashan mundaı sátsizdikke ushyramaǵan.