Densaýlyq saqtaý salasynda bilikti mamandarmen qatar em-dom kórsetetin nysandardyń zamanaýı ári talapqa saı bolýy – áleýmet kókeıindegi kóp túıtkildiń biri. Jasyratyny joq, jer-jerdegi medısınalyq uıymdardyń basym bóligi keńestik kezeńde qabyrǵasy qalanǵan eken. Búginde medısınanyń aldynda sol kóne ǵımarattardy jańǵyrtý hám jańartý mindeti tur.
Qaraǵandy oblystyq klınıkalyq aýrýhanasynyń juqpaly aýrýlar bóliminiń korpýstary da ótken ǵasyrdyń elýinshi jyldary boı kótergen. Úsh bloktan turatyn aýrýhananyń jaqynda ekinshi blogy kúrdeli jóndeýden ótti. Bul bloktyń jeldetkish, jylý, sý jáne káriz júıeleri tolyq jańardy. Sonymen qatar materıaldyq-tehnıkalyq bazasy kúsheıtildi. Aýrýhananyń bul blogy 1955 jyly salynypty. Jalpy aýmaǵy – 2 100 sharshy metr shamasynda. Munda jóndeý sońǵy ret osydan on jyl buryn jasalǵan eken.
Aýrýhana basshylyǵy kúrdeli jóndeý kezinde barlyq ınjenerlik ınfraqurylymnyń aýysqanyn aıtady. Jeldetý júıesi ár jatyn bólmede jeke dara. Bul ınfeksııanyń basqa jaqqa taramaı, aýanyń almasýyna yqpal etpek.
Buǵan qosa ǵımarattyń syrty tystalyp, jylý syrtqa shyqpaıtyndaı qaptaldy. Syrtqy ári ishki emdik gazben jabdyqtaý jelisi jóndeldi. Intensıvti terapııa bólimshesi qaıta rekonstrýksııadan ótti. Sonyń nátıjesinde, jan saqtaý blogy qabyldaý-dıagnostıkalaý bólimimen qatar ornalastyryldy.
– Jansaqtaý bólimi buryn úshinshi korpýsta edi. Bul qazirgi eki blok pen qabyldaý bóliminen bólek-tin. Onyń ústine ekinshi qabatta. Tasymaldaýda, pasıentterdi evakýasııalaýda qolaısyzdyqtar týǵyzatyn. Endi jansaqtaý bólimi birinshi qabatta, qabyldaý bóliminiń mańynda bolady. Bizdiń ortalyqtyń ereksheligi – biz 100 paıyz jedel kómek kórsetemiz. Pasıentterdiń barlyǵy derlik aýyr halde qabyldaý bóliminen ıntensıvti terapııa bólimine túsedi. Oǵan qosa osy korpýsta eki balalar bólimshesi bar, – deıdi jupaly aýrýlar ortalyǵynyń basshysy Erjan Júnisov.
Jóndelgen korpýs jańa medısınalyq qural-jabdyqtarmen de tolyqty. Atap aıtqanda, ókpeni jasandy jeldetý apparattary, tósek mańyna ornatylatyn monıtorlar, ýltra dybystyq zertteý quraldary bar. Ortalyq basshylyǵy byltyr aǵzany qat-qabat zertteýge múmkindik beretin sıfrly rentgen apparaty alynǵanyn aıtady.
Medısınalyq tehnıka men jıhazdar da jańardy. Barlyq aýrýhanaǵa SOS júıesi ornatylǵan. Dabyl tetikteri de bar.
– Jansaqtaý bólimi alty orynǵa shaqtalǵan. Bul – balany da, eresekti de qabyldaı alatyn qaladaǵy jalǵyz bólimshe. Jalpy, juqpaly aýrýlar ortalyǵynda bala men úlkenderge arnalǵan 190 oryn bar. Biz respıratorly, ishek, vırýsty ınfeksııamen aýyrǵan naýqastarǵa kómek kórsetemiz. О́tken jyly 7,5 myń naýqasqa em jasaldy, – deıdi E.Júnisov.
2019 jyly neıroınfeksııa blogy jóndelse, bıyl úshinshi blok jańǵyrmaq.
Qaraǵandy