Qurlyqtyq hokkeı lıgasynda (QHL) baq synaıtyn Astananyń «Barysy» syrt aıdyndaǵy sońǵy oıynyn Novosıbırde ótkizip, jergilikti «Sıbırden» jeńilip qaldy.
Bul elordalyq ujymnyń osy maýsymdaǵy 40-jeńilisi boldy. Jerlesterimiz munyń aldynda Ombyda «Avangardpen» kezdesip, «Shyǵys» konferensııasynyń úzdigine esh qarsylyq kórsete almaǵan-dy. Novosıbırdegi 7 400 jankúıer syıatyn «Sıbır» muzaıdyny keshenindegi matchta da Andreı Skabelkanyń shákirtteri jigersizdik tanytty. Birinshi kezeńde aıdyn ıelerinen Denıs Golýbev 3 jáne 17-mınýttarda dýbldiń avtory atansa, arada 30 sekýnd ótkende Trevor Mıorfı nysanany dál kózdep, matchtyń taǵdyryn alǵashqy kezeńde-aq sheship tastady. Úzilisten keıin Nıkıta Mıhaılıs (29) pen Egor Petýhov (39) esep aıyrmasyn bir shaıbaǵa deıin qysqartqanda, «Barys» jankúıerleriniń keýdesinde úmit oty oıanǵandaı edi. Biraq munymyz beker eken. Úshinshi kezeńniń orta tusynan aýǵanda Vladımır Býtýzov mergendigimen kózge túsip, komandasyna jeńis syılady – 4:2.
Jerlesterimiz búgin QHL-daǵy sońǵy oıynyn elordada Iаroslavldiń «Lokomotıv» klýbymen ótkizip, bıylǵy maýsymdy aıaqtaıdy.