Qazaq estrada ónerine tyń serpin berip, shabyttandyrǵan shyǵarmashylyq ujym týraly aıtpaı ketý múmkin emes. Ulttyq naqyshtaǵy mýzykalyq týyndylarmen sahna tórine jol tartqan «Gúlder» elimizdiń betke ustar ansamblderiniń biri boldy. О́nerpazdar Qytaı, Úndistan, Germanııa, Japonııa, Kýba, Bolgarııa, Mońǵolııa, Izraıl, Ońtústik-Shyǵys Azııa memleketterine gastroldik saparlarǵa shyǵyp, estradalyq-mýzykalyq revıý baǵytyndaǵy konserttik baǵdarlamalardy kórermen nazaryna usyndy.
Alpysynshy jyldardyń aıaǵynda qurylǵan ansambl alǵashynda 71 adamnan turdy. Sara Tynyshtyǵulova, Roza Rymbaeva, Qapash Qulysheva, Qaırat Baıbosynov, Aıjan Nurmaǵambetova, Maqpal Júnisova, Naǵıma Esqalıeva, Maıra Núrkenova, Sembek Jumaǵalıev, Jeńis Ysqaqova, Baqyt Shadaeva jáne basqa da talanttar óner jolyn osy ansamblden bastady. Búginde olar talǵamy bıik mádenıet qaıratkerlerine aınaldy.
Sodan beri qanshama jyldar ótti. Jańa ǵasyrǵa saı qazaq óneri men mádenıetine jańa juldyzdar legi qosylyp jatyr. Alaıda tarıhı brendimiz bolyp kelgen ansambl belgili bir sebeptermen óz jumysyn toqtatýǵa májbúr bolǵanyn bilemiz. Talaı márte ónerdiń bıik shyńyna kóterilgen mádenıet tarlandary óner oshaǵynan aıyrylýǵa shaq qaldy. Degenmen byltyr memleket tarapynan qoldaý kórsetilip, «Roza Baǵlanova atyndaǵy «Qazaqkonsert» memlekettik konserttik uıymy «Gúlder» ansambliniń shyǵarmashylyq ujymyn qaıta qurý jumystaryn qolǵa alǵan edi. Bul maqsatta ujymǵa shyǵarmashylyq oqý oryndarynyń túlekteri alyndy. Tájirıbeli tálimgerler – bas baletmeıster Anvara Sadyqova jáne jobanyń kórkemdik jetekshisi ári dırıjeri Serik Dáýletov shaqyryldy.
Jaz aılarynda ansambldiń quramyna ónerpazdardy qabyldaý úshin S.Dáýletov, A.Sadyqova, horeograf A.Shámshıev elimizdiń birqatar qalasynda kastıng júrgizdi. Sodan keıin-aq ujymnyń jańasha baǵyttaǵy qyzý daıyndyq jumysy bastalyp ketti. «Gúlder» ansambliniń burynǵy quramynda óner kórsetken talantty ánshiler men kásibı bıshiler arnaıy shaqyrylyp, ansambldiń repertýary jańa mýzykalyq shyǵarmalarmen jańartyldy.
Ańyzǵa aınalǵan ansambldiń atyn shyǵarǵan «Bıpyl» (horeograf D.Qııaqova), «Asataıaq» (horeograf Z.Raıbaev), «Malaızııa bıi» (horeograf G.Izmaılova) jáne basqa da bıler horeograf Tatıana Aýtalıpovtiń qatysýymen júrgizilip jatyr. Al jańa horeografııalyq kompozısııalardy Gúlnár Saıtova, Karına Haıtmatova, Gúlden Fatkýlla, Evgenıı Moıseev, Karına Jırenbaeva, Móldir Nyǵymet syndy horeograftar qoıdy. Qazir jańa ansamblde 15 bıshi men 9 mýzykant bar.
О́ner ujymy álemniń kóptegen elinde óner kórsetip, tanymal bolǵany belgili. Roza Baǵlanova atyndaǵy «Qazaqkonsert» memlekettik konserttik uıymynyń basty jańalyqtarynyń biri osy ansambldi qaıtadan jańa qurammen kórermenge tanystyrý bolyp otyr. Sol sebepti, kóktemniń alǵashqy kúni «Gúlder» án-bı ansambliniń tusaýkeser konsertin ótkizýdi josparlap otyrmyz. Aıta ketetin jaıt, ansambldiń vıdeoqujattary saqtalǵanymen, arhıvtik qujattardy aqtaryp otyryp, sol kezdegi qazaq bı ónerinde qoldanylǵan qımyl-qozǵalystary men bı túrlerine qatysty qundy málimetterdi taba almadyq. Sondyqtan ansambldiń basy-qasynda júrgen shyǵarmashylyq topqa osy baǵytta da kóp eńbek etýge týra keldi.
Halyq ártisi Sara Tynyshtyǵulova apaıymyz ansambl týraly: «Meniń esimde qalǵany ansambl bir jarym jyl ishinde úsh júzge jýyq konserttiń 70-ten astamyn aýyldyq jerlerde bergen. Jaqynda 1 naýryzda «Qazaqkonsert» ujymy «Gúlder» ansamblin jańa quramda tanystyrý úshin arnaıy merekelik konsert uıymdastyrǵaly jatyr eken. Ujymnyń basshylyǵyna jáne jańa ansambldiń aldaǵy jumystaryna sáttilik tileımin. Ansambl órkendesin, kórkeısin, halyqtyń yqylasyna bólensin», degen edi.
Jańa quramda jasaqtalǵan ansambldiń aldaǵy tusaýkeser konsertine barsha ónersúıer qaýymdy shaqyramyz. Sátin salsa, «Gúlder» ansambli elimizdiń túkpir-túkpirine gastroldik saparlarǵa shyǵyp, shyǵarmashylyq konsertterin ótkizetin bolady.
Aqtoty RAIYMQULOVA,
Roza Baǵlanova atyndaǵy «Qazaqkonsert» memlekettik konserttik uıymynyń dırektory