«Klassıkterdiń» toǵyz júldesi

Aleksandrııadaǵy balýan­dar básekesine Qazaqstan qura­masynyń ókilderi bıyl ekinshi márte qatysyp jatsa da, «klas­sıkterimiz» sátti óner kórsetip, jalpykomandalyq esepte ekinshi orynǵa ıe boldy. Bul synda jer­lesterimiz 2 altyn, 3 kúmis jáne 4 qola medal jeńip aldy.

Jarystyń alǵashqy kúninde bozkilemge shyqqan 55 kıloǵa deıingi salmaqta ulttyq qura­manyń 3 balýany tuǵyr bıigine kóterilip, jankúıerlerdiń qo­she­metine bólendi. Amanǵalı Bek­bolatov pen Marlan Muqashev ara­synda órbigen fınaldyq bá­se­kede alǵashqysynyń mereıi ústem bolyp, jarys jeńimpazy atandy. Al taǵy bir otandasymyz Ishar Qurbaev qola medal úshin talasta 2019 jylǵy álem chempıony grýzııalyq Nýgzarı Sýrsýmııany 7:3 esebimen jeńdi. Kúmis júldeger atanǵan Marlan alǵashqy aınalymda dál osy Nýgzarıdi utqan. Aıta keteıik, Marlan – jýyrda Almatyda ótken kú­resten el spartakıadasynyń jeńimpazy.

Kóp uzamaı bozkilemge shyqqan 60 kılodaǵy otandasymyz Ernar Fıdahmetov te bas júlde úshin beldesýge múmkindik aldy. О́kinishke qaraı, bıylǵy spartakıadanyń qola júldegeri fınalda túrkııa­lyq Kerem Kamaldyń osal tusyn taba almaı, kúmis medaldi qana­ǵat tutty. Al 63 kılodaǵy spar­ta­kıadanyń jeńimpazy Mu­ham­medáli Mamyrbek Mysyrda óz myqtylyǵyn dáleldeı almady. Ol qola júlde úshin kúreste Dastan Zarlyhanovtan jeńilip qaldy. Al spartakıadada júldege ilige al­maǵan Dastan halyqaralyq ja­rystyń qola medalin moınynda jarqyratty.

67 kıloda beldesken Mereı Bekenov óz salmaǵynda qarsylas shaq keltirmeı, Qazaqstan qura­masynyń qorjynyna ekinshi altyn júldeni saldy. Sheshýshi aıqasta ol grýzııalyq Djonı Hesýrıanıdi utty. Mereı spartakıadanyń fınalynda Qazaqstannyń dańqty balýany Almat Kebispaevqa ese jibergen edi. Asa aýyr salmaqtaǵy el chempıony Álimhan Syzdyqov qyrǵyzstandyq Roman Kımdi jeńip, qola júldeni qanjyǵasyna baılady.

Ekinshi jarys kúninde balýandar taǵy 3 salmaqtaǵy kim myq­tyny anyqtady. Bul kúngi beldesýlerde de Qazaqstan balýan­dary óreli ónerimen kózge túsip, eki salmaq dárejesinde júldegerler qatarynan kórindi. Áýeli 72 kıloda beldesken Danııar Qalenov qola medal úshin kezdesýde mysyrlyq Mahmud Haled Ábdelsatar Áb­delrahmandy 4:1 esebimen utyp, úshinshi orynǵa taban tirese, 77 kılodaǵy tájirıbeli otandasymyz Demeý Jadyraev fınalǵa deıin irkilmeı jetkenimen, sheshýshi kezdesýde osaldyq tanytyp, bol­garııalyq Aık Mnasakanıanǵa ese jiberdi.

Sóıtip, Serik Jumashev baptaıtyn Qazaqstan quramasynyń grek-rım kúresi ókilderi 2 altyn, 3 kúmis pen 4 qola medal oljalap, jal­pykomandalyq esepte 161 upaı­men 2-orynǵa turaqtady. Kósh ba­syndaǵy Grýzııa quramasynyń enshisinde 166 upaı bar.

Byltyr qarashada Aleksandrııa qalasynda ótken dál osy týrnırge grek-rım kúresinen ulttyq qurama ókilderi alǵash ret qatysyp, jalpy esepte 1-orynǵa ıe bolǵan edi. Ol kezde Dastan Zarlyhanov (63 kg), Sultan Ásetuly (67 kg), Demeý Jadyraev (77 kg), Mıras Barshy­lyqov (82 kg), Anton Savenko (130 kg) óz salmaǵynda chempıo­n atansa, Marlan Muqashev (55 kg), Ernur Fıdahmetov (60 kg), Er­asyl Nurbosynov (72 kg), Man­sur Shadýkaev kúmis júldege ıe bol­ǵan. Byltyr bul reıtıngtik ja­rys tizimine enbegen edi.

Áıelder men erkin kúres sheber­leriniń nátıjesin gazetimizdiń erteńgi nómirinen oqı alasyzdar.