Inklıýzıvti bilimniń ıgiligi

Mundaı is-sharalardy kó­mek emes múmkindik dep sıpat­taýymnyń sebebi, memlekettiń qoldaýy nátıjesinde ártúrli uıymdar men birlestikterdiń múmkindigi shekteýli jandardy qoǵamǵa aralastyrýy óz jemisin berip otyr. Sol arqyly olar qoǵamnyń beldi múshesine aınalyp keledi. Bilim alady, jumysqa turady, unaǵan kásibimen aınalysady.

Múgedektigi bar jandardy qoldaý maqsatynda jýyr­da Shymkenttegi M.Áýezov atyn­daǵy Ońtústik Qazaqstan ýnı­versıtetinde Ǵylym jáne joǵary bilim mınıstriniń ınklıýzıvti bilim berý jónindegi shtattan tys keńesshisi Tańsáýle Serikovpen kezdesý boldy. Mınıstrlik ókili jıynda ýnı­versıtet qabyrǵasynda bilim alyp júrgen júzden asa múmkindigi shekteýli jan­ǵa bilim, ǵylymnyń múmkin­dikterin pash etti, zamanaýı tehnologııalar ǵasyrynda sapaly bilim alý áleýmettik sanatyna qaramastan barlyq jas úshin mańyzdy ekenine toqtaldy.

Sonymen qatar ýnıver­sıtet­tiń erekshe stýdentterdi oqytýǵa saı beıimdelgen ın­fra­qurylymymen tanys­ty. Inklıýzıvti bilim berý ortalyǵyndaǵy qural-jab­dyq­tardy tamashalady. Máse­len, munda zaǵıp jáne kórý qabileti nashar jandarǵa arnalǵan tıfloqurylǵylar bar. Sol sekildi ekrandaǵy vızýaldy elementterdi dybys­taıtyn NVDA baǵdarlamasy ornatylǵan kompıýterler men kez kelgen kitapty dybystap, oqyp bere alatyn Clearreader jáne SARA™ CE oqý jáne jazý tehnıkalary qoıylǵan. Ortalyqta otyryp stýdenttiń ózindik jumystaryn jáne basqa da qosymsha tapsyrmalardy oryndaýǵa jaǵdaı jasalǵan. Ǵalamtor iske qosýly tur. Mundaǵy tehnıkalardy qalaǵan ýaqytta paıdalanýǵa bolady. Emtıhandardy tapsyrý yńǵaıly bolý úshin kitaptardy dybystaıtyn tehnıka http://lib.ukgu.kz/ web-saıtynda ornatylǵan. Ony kúndiz-túni qoldana berýge múmkindik bar. 

Kezdesýde ortalyqtaǵy kitaphanany damytý bóliminiń meńgerýshisi Lázzat О́teǵulova Shymkent qalalyq kózi kór­meıtin jáne álsiz kóretin aza­mattarǵa arnalǵan arnaıy jáne basqa da kitaphanalarmen kelisimshart jasalǵanyn, sonyń nátıjesinde ýnıversıtette bilim alyp jatqan múmkindigi shekteýli jandar sapaly bilimge qol jetkizgenin málimdedi.

Tańsáýle Serikov múmkindigi shekteýli jan ekenine qaramas­tan, Phd dárejesindegi professor atanyp otyrǵanyn aıtty. Sondaı-aq ol stýdent jastarǵa óziniń ómirlik tájirıbesimen bólisip, aldynan kezdesken qıyndyqtardy qalaı jeńgenin áńgimelep, jetistikke jetý úshin jigerli, talapshyl bolýǵa shaqyrdy.

Sonymen birge kezdesýde mártebeli qonaqqa bıik maq­sattardy baǵyndyrǵan jas­­tardyń jetistikteri baıan­­daldy. Máselen, Asqat Ahmed­jan búginde «Qolar­badaǵy bı» spor­tynan álemniń úsh dúrkin chem­pıo­ny, Azamat Jaqsym­be­tov eń­beginiń nátıjesinde múge­dekter arbasynan aıaqqa turǵan.

О́zim bolsam fılologııa fa­kýltetiniń jýrnalıs­tı­ka mamandyǵy boıynsha 2-kýrs stýdentimin. Kórý qabi­letim­niń nasharlyǵyna baılanys­ty 1-toptaǵy múgedekpin. M.Áýezov atyndaǵy Ońtústik Qazaqstan ýnıversıteti maǵan sapaly bilim alýmen qatar, oqý ordasynda júrip úlken jobalardy júzege asyrýyma múmkindik berdi. Úsh jylǵa jýyq ýaqyt Youtube, Tiktok áleýmettik jelilerinde kontent jasaıtyn sarapshylarmen jobalarǵa prodıýserlik etemin. О́ziń qalaǵan armanǵa umtylsań, naqty maqsattar qoıyp sony oryndaý jolynda ter tókseń, bári de sen oılaǵandaı bolatynyna kózim jetti. Eń bastysy maqsat pen umtylys bolsa, múmkindiktiń shekteýliligi adamǵa kedergi emes. Sol úshin kezdesýde belsendi stýdent retinde áleýmettik jelini durys paıdalana bilsek, tabys tabýǵa zor múmkindik ashylady degen oıymmen bólistim.

Osyndaı qyzyqty kezdesýler, múmkindigi shekteýli jandardy jumysqa beıimdeýge baǵyttalǵan túrli qoldaý sharalary turaqty túrde óz jalǵasyn taýyp otyrsa, nur ústine nur bolar edi.

Bekjan NURADIN,

M.Áýezov atyndaǵy OQÝ stýdenti