Mektep partasymen qosh aıtysqan árbir jastyń aldynda mamandyq tańdaý deıtin mańyzdy qadam turady. Attaı qalap túsken mamandyǵynan mán tappaı, ıakı jibi túzý jumystyń reti kelmeı jol ortadan baǵyty basqa arnaǵa burylatyndar jeterlik. Proforıentologter munyń sebebin túrli jaǵdaımen túsindiredi. Jany súımegen jumys adamdy kele-kele qajytsa, keıde kerisinshe kezdeısoq tańdaǵan kásip juldyzyn jaǵady.
Bul tusta basa mán berer tirek – adamnyń jigeri men yntasy hám ózine degen senimi. Qulshyna kirisken kishkentaı kásiptiń ózi taýdaı tabys ákelip jatsa tańǵalmańyz. Al óz isińizdi janyńyzben súıip, armandaı almasańyz, bári beker. Búgingi áńgimemizdiń keıipkeri talaı zamandasyna úlgi bolar almatylyq tiginshi bala – Baǵdáýlet Parsahanov. Baǵdáýlet 19 jasta. Kásibı kýrstyń kómegimen-aq myqty mamanǵa aınalǵan. Onyń qolynan shyqqan klassıkalyq úlgidegi erler kıimderi kádimgideı suranysqa ıe. Mektep bitirer tusta bala kúnnen yntasy aýǵan kásipke qadam basqan.
– 2020 jyly Almaty qalasyndaǵy №86 mektep- gımnazııany bitirdim. Oqý úlgerimim oıdaǵydaı edi, UBT-dan jınaǵan 91 balmen birqatar oqý ornyna grantqa túsýge múmkindik boldy. Alaıda jıǵan balym ózim qalaǵan mamandyqqa jetkiliksiz bolǵandyqtan qujat tapsyrýdan bas tarttym. Ákem erte dúnıe salǵandyqtan aqyly bólimde oqyp jalǵyz anama júk túsirgim kelmedi. Tigin isine qyzyǵatynmyn. Ásirese erlerge arnalǵan qymbat kostıýmder tigetin tabysty dızaınerlerdiń paraqshasyna jazylyp, jumys barysyn baqylap júrdim. Birte-birte ózime keregi osy ekenin túsinip, aqyly kýrsqa jazylýǵa bel baıladym. Anama bul kásip úlken suranysqa ıe ekenin, myqty maman bolsam dalada qalmaıtynymdy aıtyp kóndirdim áıteýir. Onyń ústine aqyly túrde oqýǵa tússem, bir jyldyń ózinde mıllıon teńge tóleýime týra keledi, quny 600 myń turatyn kýrsty oqý da bizdiń otbasymyz úshin úlken táýekel boldy. Dese de anam men aǵam meni qoldady. Bul salanyń qyr-syryna baýlyp júrgen Áset Aımanov – elimizdegi myqty tiginshilerdiń biri. Bolashaqta atele ashyp, óz kásibimdi órge súıreýdi maqsat etemin, – deıdi Baǵdáýlet Parsahanov.
Talantty jastyń talaby súısindirdi. Kózinen óz isine degen adaldyǵy ushqyndap tur. Tigin óneriniń túrli ádisin meńgerýmen shektelmeı, salaǵa qatysty álemdik naryqta suranysqa ıe trendterdi tizbelep, sońǵy úlgidegi kıiný mádenıeti týraly saraptap aıtyp berdi. Taza qol eńbeginen shyqqan ónim qashanda baǵaly. Deıturǵanmen halyqtyń ál-aýqaty ony tolyq túsinýge jete qoımaǵanyn aıtady.
– Bizdiń eldegi kóp tigin sheberhanalarynda negizgi basymdyq áıelder kıimine berilgen. Erler kostıýmderin tigetin sanaýly oryndardyń ózi áli kúnge deıin baıaǵy keńestik tehnologııanyń ádisterin qoldanady. Biz klassıkalyq kıimderdiń ejelgi otany aǵylshyn tehnologııasyn negizge alamyz. Kóp otandastarymyz bul tehnologııadan habarsyz. Álemdik trendte kún saıyn túrli jańalyqtar bolyp jatsa da, klassıkalyq kıim óz bıiginen túspeıdi. Sapaly ónimdi baǵalaıtyndar, mundaı aıryqsha ádispen tigiletin kıimderdiń artyqshylyqtaryn jaqsy túsinedi. Naǵyz sapaly kostıým júris-turysqa yńǵaıly ári jep-jeńil bolýy kerek. Tipti tigisteriniń qyrtystaryna deıin bilinbeıdi. Terletpeýi kerek. Bazardaǵy kóp ónim úlken sehtarda tigiletindikten jelim paıdalanady. Kóp jaǵdaıda jelimniń áserinen kostıým terletkish ári aýyr bolyp keledi. Bizdiń ádiste jelim múlde qoldanylmaıdy. Qol jumystarynyń tigisi sozylǵysh bolǵandyqtan, ústińe yńǵaıly otyrǵanyn sonshalyq, sezbeı de qalasyń. Bul isten múlde habary bolmasa da eki ónimdi salystyra kıip kórgen adam jer men kókteı aıyrmashylyqty birden baıqaıdy, – deıdi Baǵdáýlet.
Tanymal tiginshi Áset Aımanovtyń qol astynda jumys isteıtin talapty jas zamanaýı medıanyń múmkindikterin paıdalana otyryp, jeli oqyrmandaryna kostıým tigýdiń ádisteri men bul baǵyttaǵy túrli tehnologııalar týraly aqparat berýdi ádetke aınaldyrǵan. Biz de Baǵdáýletti ınstagram jelisindegi bakdaulet_tailor paraqshasy arqyly kezdeısoq taýyp aldyq. Jas maman jelide oqyrmandaryna óz jumystaryn tanystyra otyryp, tigin barysynda ózderi qoldanatyn «Bespoke» mádenıetiniń erekshelikterin tanytýdy kózdeıtinin aıtady.«Jaqsy kıiný adamnyń talǵamyn qalyptastyryp qana qoımaı, ózin kez kelgen ortada erkin sezinýge kómektesedi. Bul turǵyda talǵam úlken ról oınaıdy. Kóp dúkenderdegi taýarlar óz sapasyna tatymaı jatady. Keıde 50-60 myńǵa alǵan kostıým men 150 myń teńgege alǵan kostıýmniń sapa turǵysynan pálendeı aıyrmashylyǵy bolmaýy múmkin. Halyqqa osyny túsindirgim keledi. Negizi kostıým kııýdiń ózindik mádenıeti bar. Qandaı is-sharaǵa qandaı kostıým kııý kerek, jeńiniń, shalbarynyń uzyndyǵy qandaı bolýy qajet, osynyń bárine mán berýge úıretemiz», dep oı bólisti jas tiginshi.
Baǵdáýlettiń boıynan óz kásibine degen jiger-jalynnyń tasqynyn baıqadyq. Bolashaqta joǵary bilim ıesi ataný da josparynda joq emes. Ázirge tigin isiniń qyr-syryn tereń meńgerip elge belgili tiginshi bolýdy armandaıdy. Jaı ǵana armandap emes, talpynyp, talaptanyp júr.
О́tkende bir tanysymyz: «Kórshiniń balasy az ýaqytta avtoelektrık kásibin meńgerip edi, aýlasynan kólik úzilmeıdi, advokat bolam dep alty jyl oqyǵan bizdiń júgermek jeti jyldan beri jelkesin qasyp áli júr», dep edi. Jurttyń bári muǵalim men dáriger, polısııa men prokýror bolmasy taǵy anyq. Árıne, akademııalyq bilim alyp, kókjıegińdi keńeıtkenge ne jetsin. Dese de ata-anasy aýzynan jyryp oqytqan dıplomyn mise tutpaı, qııal qýyp júrgen jastar qanshama?! Talapqa saı maman tasada qalmaıdy. Bul sózimizdiń jarqyn mysaly – Baǵdáýlet Parsahanov.
ALMATY