О́tken aptanyń juma kúni «Qazaqstan temir joly» UK» AQ-tyń 190 qyzmetkeri úıli boldy. Atap aıtqanda, ulttyq kompanııa prezıdenti Asqar Mamın elordanyń VIP-qalashyǵynda ornalasqan «Saranda» turǵyn úı kesheninen temirjolshylar otbasylaryna páter kiltterin tabys etti. Ondaǵy kezekte turǵan ár qyzmetkerge páter arnaıy qurylǵan komıssııanyń sheshimimen berilip otyr.
Saltanatty shara barysynda jańa shaǵyn aýdanǵa ekskýrsııa jasaldy. Shaǵyn aýdan dep aıtýymyzdyń sebebi,osynaý aýdanǵa sońǵy eki jylda atalǵan ulttyq kompanııa 12 birdeı záýlim ári ásem úı turǵyzyp, 1000 temirjolshy qonys toıyn toılap jatyr. Shaǵyn aýdannyń ornalasqan jeri kez kelgen astanalyqtyń qyzyǵýshylyǵyn týdyrary anyq. Ol Prezıdent parkiniń oń jaq betinen oryn tepken. Tipten Aqordadan taıaq tastam jerde desek naqtyraq bolady. Ekskýrsııa demekshi, temirjolshylarǵa arnap salynǵan sáýleti aıryqsha záýlim úıler Astana ajaryn asha túskeni anyq. Sondaı-aq, ár úıdiń aýlasyna qatar tizilip egilgen arsha-shyrshalar kórkem ǵımarattarǵa kórik qosyp tur. Tep-tegis alańqaılarǵa ornatylǵan oıyn oryndary men jabdyqtary ádemi ári qaýipsiz. Bir sáýlet syzbasymen sap túzegen úıler alystyń ózinen men mundalap kóz tartady.
Bul turǵyn úıler de «Qazaqstan temir joly» UK» AQ-tyń turǵyn úı baǵdarlamasy aıasynda boı kótergen. Páter ıeleri bastapqy tólem aqysyz, aldaǵy 15 jylda qolaıly keste boıynsha eseptesedi. Barlyq páterler derbes jylytý júıesimen, gaz plıtasy, santehnıkalyq jabdyqtarmen qamtylǵan. Saltanatty shara bastalmas buryn shaǵyn aýdan turǵyndarynyń birnesheýin sózge tarttyq. Báriniń de qýanyshy qoıynyna syımaı júr. Beıbitshilik pen tatýlyqta ómir súrip jatqan Qazaqstan halqy osyndaı jaqsy turmysqa laıyq ekendigin aq júregimen aǵytyla aıtady. Halqymyzdyń áleýmettik jaǵdaıyn aldyńǵy qatarǵa qoıyp, ál-aýqatyn kóterý maqsatynda el ekonomıkasyn damytýdy birinshi orynǵa shyǵarǵan Elbasyna aıtar alǵystary sheksiz. Aıtqandaı, birer jylǵa sheginis jasasaq, dál osy «Saranda» turǵyn úı keshenindegi alǵashqy páterlerdiń kiltin temirjolshylarǵa Memleket basshysy Nursultan Nazarbaevtyń ózi tapsyrǵan edi. Temirjolshylarǵa osy úıdi tapsyrǵan kezde Elbasy alǵashqy páter ıelerine kiltti tabystap turyp, «Temirjolshylar eshqashan buryn mundaı úıde turǵan emes» degen edi. Bul shyndyq. Osynaý aqıqattardyń aınasyna baqsaq, Tuńǵysh Prezıdentimiz sózinde turyp eldiń ál-aýqatyn jylma-jyl jaqsartyp keledi. Endi, mine, jańa páterlerdiń kilti jańa ómirlerge joldama berip jatyr.
Sonymen, saltanatty jıynǵa qaıta oralsaq, ıgi sharaǵa temirjolshylar men olardyń ardagerleri, sondaı-aq, elordalyq qarapaıym turǵyndar men buqaralyq aqparat quraldarynyń jýrnalısteri kelipti. Qýanysh ıeleriniń mereıli sátin qyzyqqa toltyrýdy jón sanaǵan ulttyq kompanııa jetekshileri bir top óner juldyzdaryn shaqyrypty. Nátıjesinde Astananyń tórinen oryn tepken jańa shaǵyn aýdandy ásem án men tátti kúıge bólep, jınalǵan qaýymdy sazdy áýender terbep turdy. Júzderinen shattyqtyń shýaqty nury shashyraǵan balǵyn bóbekter men bozbala-boıjetkender áserli ánderdi birge shyrqatyp júr.
Qýanysh ıelerin quttyqtaǵan ulttyq kompanııa prezıdenti Asqar Mamın temirjol men onyń qyzmeti týraly tereńnen tolǵap, sóz aıtty. Eldiń erkin damýyna osyndaı ǵalamat múmkindikter týdyryp otyrǵan Elbasynyń qamqorlyǵyna rıza kóńilin bildirdi.
– Memleket basshysynyń júrgizip otyrǵan sarabdal saıasatynyń arqasynda, sizder búgin jańa páterlerdiń qýanyshyn toılap otyrsyzdar. Qazaqstandyq azamattardyń ál-aýqatyn jaqsartyp, turǵyn úımen qamtamasyz etý Elbasynyń kún tártibinen túspeıtin basty máselesi ekenin kúndelikti ómirden kórip otyrsyzdar. Sondyqtan men sizderdi Elbasynyń senimdi bolashaqqa jasap otyrǵan qadamdaryn joǵary baǵalaýǵa shaqyramyn. Sondaı-aq, ózderińizge málim bıyl «Qazaqstan temir joly» ulttyq kompanııasy – Qazaq temir jolynyń 110 jyldyq mereıtoıyn atap ótýdi maqsat tutyp otyr. Búgingi kúnde ulttyq kompanııa qarqyndy damyp, álemdik deńgeıdegi kóliktik-logıstıkalyq kompanııaǵa aınalyp bara jatyr.
Biz ulttyq kompanııanyń, jalpy temirjoldyń ósip-órkendeýine súbeli úlesin qosyp otyrǵan eńbekkerlerdi eleýsiz qaldyrǵan emespiz. Múmkindiginshe olardyń turmystyq jaǵdaıyn jaqsartýǵa tyrysyp kelemiz. Ulttyq kompanııa qabyldaǵan turǵyn úı baǵdarlamasy sonyń jarqyn bir dáleli. Sońǵy bes jylda temirjolshy qaýymyna 3300 páter berildi. Kóptegen úı shaǵyn stansalarda salyndy. Qarasaq, jańa páter ıeleriniń 25 paıyzyn jastar qurap otyr.
Bıyl biz Jezqazǵan – Beıneý, Arqalyq – Shubarkól temirjoldaryn paıdalanýǵa tapsyrýdy kózdep otyrmyz. Bularmen birge, Aqtóbedegi rels shyǵaratyn zaýyt ta paıdalanýǵa beriletin bolady. Bul ıgi ister siz ben bizdiń, jalpy temirjolshylardyń yntymaq-birligi men zor eńbeginiń jemisi ekenine daý joq. Sondyqtan da, ár temirjolshy jaqsy úıde turýǵa, jaıly ómir súrýge laıyqty. Úıli bolǵan qýanyshtaryńyz uzaǵynan súıindirsin! Qonys toılaryńyz qutty bolsyn, barshańyzǵa mol baqyt, zor densaýlyq, jemisti eńbek tileımin, – dedi ulttyq kompanııanyń prezıdenti Asqar Uzaqbaıuly.
Saltanatty sharaǵa qatysyp, temirjolshylardy jańa páterge ıe bolǵan qýanyshtarymen quttyqtaýǵa ulttyq kompanııa prezıdentiniń keńesshisi, qurmetti temirjolshy Nyǵmetjan Esenǵarın, qazaqtyń tuńǵysh ǵaryshkeri, Keńes Odaǵynyń Batyry, Halyq Qaharmany Toqtar Áýbákirov te kelgen-di. О́z kezeginde mártebeli meımandar da sóz alyp, jańa páter ıelerine ıgilik tiledi.
Izgi shara barysynda jańa úılerdiń kiltin alǵan baqytty jandarǵa da sóz berildi. Olardyń qatarynda «Lokomotıv» AQ tehnıkalyq damý basqarmasy tehnıkalyq damý bóliminiń bas mamany Amankeldi Túmenov aqjarma kóńilmen óz otbasynyń, búkil áýletiniń qýanyshy týraly aıtyp, Memleket basshysyna syndarly saıasaty men el damýyndaǵy eren eńbegi úshin, al ulttyq kompanııa jetekshilerine eńbekkerlerge jasap otyrǵan qamqorlyqtary úshin alǵysyn bildirdi.
– Qurmetti Asqar Uzaqbaıuly, qurmetti áriptester! Búgin biz úshin úlken qýanyshty kún. Kóp jyl kútken páterimizdiń kiltin qolǵa alyp jatyrmyz. О́z basym segiz jyl kezekte turdym. Endi, mine, otbasym jeke úıli bolyp jatyr. Meniń anam da temirjolǵa kóp jyl ter tókti. Búgin bizge berilip jatqan myna záýlim úı rasynda qııal men armannyń aqıqatqa aınalǵany degim keledi. Elbasy Nursultan Nazarbaev elimiz táýelsizdik alǵaly beri halqyna bergen ýádesin isimen dáleldep, halyqtyń ál-aýqatyn jyl ótken saıyn jaqsartyp keledi. Buıyrtsa, jańa páter jańa ómirge joldama beredi. Men Qazaqstan temirjolynyń jastary atynan Elbasyna, ulttyq kompanııa basshylyǵyna zor alǵysymdy bildiremin, – dedi bas maman.
Sóz kezegi kelgende «Kaztransservıs» AQ Soltústik fılıaly Astana agenttiginiń júk qabyldap-tapsyrýshysy Dınara Muhamedjanova ulttyq kompanııanyń jetistikterimen qatar qarapaıym jumys adamyna da barynsha jaǵdaı jasalyp jatqanyn aıtty.
– Úı bolmaı kúı bolmaıdy, – dep bastady ol sózin. – Elordanyń tórinen baspana alý – árbir adamnyń úlken armany. Búgin biz sol armanymyzǵa qol jetkizip otyrmyz. Elbasyna temirjol basshylyǵyna mol alǵys. Jańa páterlerińizde tek qana qýanysh bolyp, óz úılerińizde qut-berekege kenele berińizder. Elimizdiń túkpir-túkpirinde úıli bolyp jatqan barlyq áriptesterimdi zor qýanyshtarymen quttyqtaımyn, – dedi ol.
Shattyqqa toly sharanyń sońy án-kúıge ulasty. Toqsan aýyz sózdiń tobyqtaı túıinine tirelsek, «Qazaqstan temir joly» UK» AQ-tyń turǵyn úı baǵdarlamasy 2011-2015 jyldarǵa arnalǵan. Osy baǵdarlama sheńberinde jáne ulttyq kompanııada jasalyp jatqan áleýmettik aksııalar nátıjesinde turǵyn úı kezeginde turǵandardyń sany búginde úsh esege deıin azaıypty.
Nurbaı ELMURATOV,
«Egemen Qazaqstan».