Túrkııanyń Malatıa provınsııasynda jer silkindi. Apat saldarynan qıraǵan úılerdiń astynan 32 adam qutqaryldy, dep habarlaıdy Egemen.kz Anadolu agenttigine silteme jasap.
Túrkııa úkimetiniń Tótenshe jaǵdaılardyń aldyn alý jáne zardaptardy joıý basqarmasynyń (AFAD) basshysy Iýnýs Sezerdiń aıtýynsha, jerasty dúmpýleri saldarynan 29 turǵyn úı qırap, bir adam qaza taýyp, Malatıanyń 110 turǵyny jaraqat alǵan. Eki úıdiń qırandylarynda qutqarý jumystary jalǵasyp jatyr.
Izdestirý-qutqarý jumystaryna 657 adam jumyldyryldy.
Iýnýs Sezer azamattarǵa búlingen úılerden aýlaq bolýdy eske saldy.
«Tótenshe jaǵdaı aımaǵynda turatyn barlyq azamattar uıaly telefondaryna SMS habarlama aldy. Jerasty dúmpýleri jalǵasyp jatyr, úıler taǵy qulaýy múmkin», dep eskertti ol.
Eske salaıyq, Túrkııanyń Malatıa qalasynda magnıtýdasy 5,6 bolatyn jer silkinisi boldy. Epısentri Eshılıýrt aımaǵynda bolǵan jer silkinisi saldarynan 1 adam qaza taýyp, 69 adam jaraqat aldy.