Aleksandrııa (Mysyr) qalasynda uıymdastyrylǵan Olımpıada chempıony Ibrahım Mustafany eske túsirýge arnalǵan kúres túrlerinen reıtıngtik týrnır aıaqtaldy. Jarystyń sońǵy kúninde jankúıerler áıelder men erkin kúres sheberleriniń tartysty beldesýin tamashalady.
Qyzdar arasyndaǵy saıysta Elmıra Syzdyqova men Marına Sedneva úzdikter qatarynan kórinip, el qorjynyna qola júlde saldy. Asa aýyr salmaqta beldesetin Syzdyqova alǵashqy aınalymda fransııalyq Sıntııa Veskannan basym túskenimen, shırek fınalda qytaılyq Jýan Vangten jeńilip qaldy. Abyroı bolǵanda Jýan fınalǵa shyǵyp, Elmıra jubanysh beldesýine múmkindik aldy. Bul kezeńde ol taǵy bir otandasymyz Gúlmaral Erkebaevadan aılasyn asyryp, qola júlde úshin kúreste úndistandyq balýandy taza utty.
Bıylǵy Qazaqstan spartakıadasynda 55 kılo salmaqta top jarǵan Marına Sedneva da Mysyrdaǵy týrnırde úzdik úshtikten kórindi. Jarysty shırek fınaldan bastaǵan otandasymyz alǵashynda amerıkalyq sportshyny utqanymen, jartylaı fınalda túrkııalyq Badıha Gýnge ese jiberdi. Al qola medal úshin ótken beldesýde úndistandyq Sýshma Shokennen basym tústi.
Sondaı-aq erkin kúres básekesinde óner kórsetken eki ókilimiz de tuǵyr bıiginen kórindi. 57 kıloda beldesken spartakıada jeńimpazy Rahat Qaljan men asa aýyr salmaqtaǵy Iýsýp Batyrmurzaev úshinshi orynǵa taban tiredi. Bul synda R.Qaljan men Iý.Batyrmurzaev amerıkalyq balýandardyń osal tusyn taýyp, qola júldege qol jetkizdi.
Úsh kúnge jalǵasqan jarysta Qazaqstan quramasynyń balýandary 13 medal oljalap, jalpykomandalyq esepte úzdikter qatarynan kórindi.