Almatyda desantshylar joǵary synyp oqýshylarmen kezdesý ótkizdi. Patrıottyq is-sharaǵa qalanyń barlyq aýdandarynan úsh júzden astam joǵary synyp oqýshylary, alǵashqy áskerı daıyndyq pániniń muǵalimderi men jergilikti áskerı basqarý organdarynyń ókilderi qatysty.
Oqýshylardyń Almaty qalasynda ornalasqan Desanttyq-shabýyldaý áskerleri quramasymen tanysýy kazarmadan bastaldy. Jasóspirimderge merzimdi qyzmettegi sarbazdardyń turmysy kórsetildi. Olar mektep oqýshylaryna tósek jınaý, aıaq kıim tazalaý jáne kıimdi uqypty búkteý sııaqty áskerdegi laıfhaktardy kórsetti.
– Oqýshylar áskerdegi qyzmet týraly kóp bile bermeıdi. Biz olarǵa sarbazdardyń qalaı ómir súrip jatqanyn, qyzmetin kórýge, sondaı-aq munda qandaı áskerı-eseptik mamandyqtardy úırenýge bolatyny týraly bilýge múmkindik beremiz. Desanttyq-shabýyldaý áskerlerindegi qyzmet jas jigittiń áleýetin ashady. Ol ózine degen senimdilikti arttyrýǵa, naǵyz adal dostar tabýǵa, jalpy aıtqanda, Otannyń naǵyz qorǵaýshysy bolýǵa múmkindik beredi, – deıdi áskerı bólim komandıriniń tárbıe jáne ıdeologııalyq jumystar jónindegi orynbasary, podpolkovnık Baqytjan Qyrǵyzalıev.