Keshe Táýelsizdik saraıynda Ekonomıkalyq yntymaqtastyq jáne damý uıymynyń Qazaqstanǵa arnaıy daıyndaǵan eldik baǵdarlamasy talqylandy. Oǵan atalǵan uıymnyń qyzmetkerleri men elimizdegi birqatar vedomstvo basshylary qatysty.
Sharanyń birinshi bólimi aıaqtalǵan soń Ekonomıka jáne bıýdjettik josparlaý mınıstri Erbolat Dosaev pen Ekonomıkalyq yqpaldastyq jáne damý uıymynyń Syrtqy baılanystar jónindegi hatshylyǵynyń dırektory Markos Bontýrı buqaralyq aqparat quraldary ókilderiniń aldyna shyqty. Mınıstr birinshi sóz kezegin mártebeli qonaqqa berdi. Qonaqtyń sózine qaraǵanda, eldik baǵdarlama uıymǵa da, Qazaqstan memleketiniń erkin damýyna da úlken múmkindikter týdyrmaq.
Qazaqstan osyndaı baǵdarlamany júrgizýge arnaıy tańdalǵan tórt memlekettiń biri bolyp tabylady. Osy oraıda Qazaqstannyń eldik baǵdarlamasy Ekonomıkalyq yntymaqtastyq jáne damý uıymy men Qazaqstan arasyndaǵy qatynastardy ári qaraı nyǵaıtýǵa yqpal etedi dep úmittenemiz. Sóıtip, sizderdiń elmen aradaǵy qatynastarǵa aıryqsha mán beremiz. Bul turǵyda atalǵan baǵdarlama ózara tıimdi bolatynyna senimdimin. Aldaǵy alty aıda biz qazaqstandyq dostarymyzben tyǵyz baılanysta jumys isteıtin bolamyz. Osy baǵyttaǵy jumystar baǵdarlamany pysyqtaýǵa negizdeledi, dedi ol.
Qazaqstan Respýblıkasy men Ekonomıkalyq yntymaqtastyq jáne damý uıymy arasyndaǵy 2015-2016 jyldarǵa arnalǵan yntymaqtastyqtyń eldik baǵdarlamasy jobasyn talqylaý jumysy áli de jalǵasyn taýyp, jyl sońyna deıin kelisilip, sodan keıin ǵana qol qoıylatyn bolady. Muny Ekonomıka jáne bıýdjettik josparlaý mınıstri aıtty. Eldik baǵdarlama EYDU-nyń uıymnyń quramyna kirmeıtin eldermen ózara is qımyldarynyń jańa quraly bolyp tabylady. Bul baǵdarlama alǵash ret tórt memleketke ǵana daıyndalyp otyr. Qazirgi ýaqytta Eldik baǵdarlama jobasy memlekettik basqarý, fıskaldyq saıasat, básekege qabilettilik, iskerlik ahýaldy jaqsartý jáne turaqty damý syndy salalardaǵy birlesken bastamalardy júzege asyrýdy qarastyrady. Bul tizim áli de uzara túsýi yqtımal», dedi mınıstr.
Nurbaı ELMURATOV,
«Egemen Qazaqstan».