TMD elderiniń baıqaýshylar mıssııasy kezekten tys Májilis saılaýyna daıyndyq barysy men saıası naýqandy ótkizý is-sharalaryna qatysty monıtorıng júrgizýdi bastady. Bul týraly TMD bas hatshysynyń birinshi orynbasary Leonıd Anfımov BAQ ókilderine arnalǵan brıfıngte málimdedi.
Aldymen Ortalyq saılaý komıssııasynyń tóraǵasy Nurlan Ábdirov TMD bas hatshysynyń birinshi orynbasary L.Anfımovpen kezdesip, aldaǵy saılaý naýqanynyń negizgi kezeńderi týraly aqparat berdi. Atap aıtsaq, partııalyq tizimderdi tirkeý qorytyndylary, saıası partııalardyń ataýlaryn saılaý bıýlletenine engizý boıynsha jerebe tartý nátıjeleri, jalpy Parlament Májilisiniń depýtattyǵyna kandıdattardy tirkeý, onyń ishinde bir mandatty aýmaqtyq okrýgter boıynsha saılanǵan kandıdattardy tirkeý jáne halyqaralyq baıqaýshylardy akkredıtteý barysyn baıandady. OSK tóraǵasynyń aıtýynsha, búgingi tańda 16 shet memleket pen 4 halyqaralyq uıymnan 163 halyqaralyq baıqaýshy akkredıttelgen.
Sondaı-aq ol TMD baıqaýshylary mıssııasyna elimizde buǵan deıin ótkizilgen saılaýlarǵa turaqty qatysqany úshin alǵys aıtyp, Mıssııanyń osy saladaǵy úlken tájirıbesin atap ótti. Al Mıssııanyń jumysyn TMD bas hatshysynyń birinshi orynbasary Leonıd Anfımov arnaıy brıfıngte tanystyrdy.
– Bul bizdiń Qazaqstandaǵy Parlament jáne Prezıdent saılaýyndaǵy 17-shi jáne jalpy TMD keńistigindegi 120-shy mıssııamyz ekenin atap ótkim keledi. TMD baıqaýshylary mıssııasynyń quramyna TMD memleketteri ókilderinen bólek, TMD-daǵy qatysýshy memleketterdiń parlamentaralyq assambleıasynyń, UQShU parlamenttik assambleıasynyń, Belarýs pen Reseı parlamenttik assambleıasynyń, TMD Atqarýshy komıtetiniń baıqaýshylary kiredi. TMD baıqaýshylary mıssııasy músheleriniń jalpy sany shamamen 200 adamdy quraıdy. Keshe TMD baıqaýshylar mıssııasy Astanada jumysyn bastady, – dedi L.Anfımov.
Sonymen qatar mıssııa ókilderi saıası partııalardyń saılaýaldy shtabtarymen, depýtattyqqa kandıdattarmen birneshe kezdesý ótkizip, barlyq deńgeıdegi saılaý ýchaskesiniń jumysymen tanysady. Baıqaýshylardyń negizgi toby daýys berýge 2-3 kún qalǵanda, ıaǵnı 16-17 naýryzda Astanaǵa keledi dep josparlanǵan. Mıssııa baıqaýshylary daýys berý barysyn tek Astanada ǵana emes, eldiń ózge de óńirlerinde baıqaıtyn bolady.