Jambyl aýdanyna qarasty Tastóbe aýylyndaǵy «Qyzyl dıhan» óndiristik kooperatıviniń qurylǵanyna shırek ǵasyrdyń júzi boldy. Jemisti eńbek etip kele jatqan kooperatıvtiń jumysyn jaqsy baǵalaıtyndar az emes. Nýrıtdın Begmanov basqaratyn ujymda aýyl sharýashylyǵyna qajetti tehnıkalar jetkilikti. Sondaı-aq basshylyq qyzmetkerlerdiń jaǵdaıyn jaqsartýǵa da basymdyq berip otyr.
Kooperatıvtiń enshisinde jalpy kólemi 2412,18 gektar jer bar. Árıne, az emes. Ujym basshylary 2282,18 gektar alqapty aýyl sharýashylyǵy maqsatynda paıdalanady. Naqtyraq aıtar bolsaq, egistik jer kólemi 2141,28 gektar bolsa, sýarmaly jer 1723,61 gektardy quraıdy. Al shabyndyq jerdiń úlesi 134,9 gektar.
Kooperatıvte egis alqabyna qajetti 8 dana traktor, 9 dońǵalaqty K-700, MTZ, 2 júk tasymaldaý kóligi, 2 janarmaı tasymaldaıtyn, 1 avtokran, 7 dánsepkish jáne 52 aýylsharýashylyq tirkeme tehnıkalary bar. Sonymen qatar astyq oratyn kombaın, 2 qyzylsha kombaıny, 2 jemshóp kombaıny, 2 dana shóp taılaǵysh, 3 búrikkish naýqan kezinde paıdalanylady. Bir sózben aıtqanda, kooperatıv basshysy naýqan kezinde tehnıka máselesine asa qatty bas aýyrta bermeıdi.
«Búgingi tańda bizde aýyldyń elý turǵyny eńbek etip júr. Olar atqarǵan jumystaryna sáıkes 130-150 myń teńge kóleminde jalaqy alady. Árıne, eńbekkerlerdiń jaqsy aılyq alyp, kóterińki kóńil kúımen jumys isteýine qoldan kelgenshe tyrysyp júrmiz.
Sońǵy birneshe jyldyń bederinde qant qyzylshasyn egýdi qolǵa alǵan jaıymyz bar. Nátıjesi jaman emes. Sońǵy naýqan kezinde gektarynan 810 sentnerden ónim aldyq. Aldaǵy ýaqytta da jaqsy nátıje kórsetýge nıettenip otyrmyz. Ujymdaǵy barlyq azamat eńbegine adal ekenin aıta ketken lázim. Olar mańdaı termen tapqan tabystyń tátti bolatynyn jaqsy biledi.
Sońǵy jyldary baltamyr egýge elimiz boıynsha aıryqsha nazar aýdarylyp otyrǵany belgili. Sondyqtan bul baǵyttaǵy jumystardy jetildire túsýge nıettimiz. О́ıtkeni qant qyzylshasyn molynan ósirýge óńirimizde de basymdyq berilip, oǵan qyzyǵýshylyq tanytqan sharýalardyń qarasy artyp keledi. О́ńirdegi basshylardyń qoldaýyn sezingen biz egistik alqabyn jyl ótken saıyn arttyrýǵa, jańa tehnologııany engizýge kúsh salýdamyz», deıdi kooperatıv basshysy.
Kooperatıv basshysynyń sózine sensek, bıyldyqqa 300 gektarǵa kúzdik bıdaı egipti. Sonymen qatar 700 gektar alqapqa jazdyq arpa ornalastyrsa, 50 gektar jerge dándik júgeri otyrǵyzǵan. Joǵaryda aıtqanymyzdaı, kooperatıv basshysy qant qyzylshasy alqabyn ulǵaıtýǵa erekshe den qoıǵan. Bıyl 115 gektar jerge baltamyr ekken.
«Jalpy alǵanda kooperatıv jumysy jyl ótken saıyn shıraı túsýde. Tehnıkamyz jetkilikti. Naýqandy jyldaǵy dástúrge saı ýaqtyly bastaımyz. Barlyq jumystardy der kezinde atqaramyz. Buıyrsa, aldaǵy naýqanda aıtarlyqtaı jaqsy nátıje kórsetemiz degen oıymyz bar. О́ıtkeni aýa raıy sharýalarǵa qaraılasyp tur», deıdi N. Begmanov.
Sońǵy birneshe jyldyń bederinde óńirde qant qyzylshasyn ósirýge aıryqsha den qoıylǵan. О́ńir basshysy Nurjan Nurjigitov te sharýalarǵa baltamyr ósirýdiń mańyzdylyǵyn jıi aıtyp júr. Jalpy, memleket tarapynan qoldaýdyń mol ekenin sezingen kooperatıvter men sharýa qojalyq basshylarynyń qant qyzylshasyn egýge degen qyzyǵýshylyǵy arta túskeni qýantpaı qoımaıdy. «Qyzyl dıhan» óndiristik kooperatıviniń ujymy da sol qatarǵa qosylǵany quptarlyq is.
Jambyl oblysy,
Jambyl aýdany