Bıyl Alǵys aıtý kúni Almaty oblysynda keń kólemde atalyp ótedi. 20 aqpannan bastaý alǵan merekelik onkúndik 1 naýryzda Qonaev qalasynda etnostardyń mádenıet kórmesi men festıvalimen qorytyndylanbaq, dep habarlaıdy Egemen.kz.
«Bir maqsat. Bir múdde. Bir bolashaq» taqyrybynda ótetin sharada óńirdegi etnostardyń mádenıeti men salt-dástúrleri kópshilik nazaryna usynylmaq. Budan bólek, etnomádenı birlestikterdiń konserttik baǵdarlamasy da uıymdastyrylady.
«Alǵys aıtý merekelik onkúndigi aıasyndaǵy negizgi is-sharalar 1 naýryzda oblys ortalyǵy – Qonaev qalasynda ótkiziledi. «Raqmet saǵan, Qazaqstan!» jalpy ataýymen ótetin is-sharalar «Bir ult. Bir maqsat. Bir qundylyq» etnostardyń mádenıet kórmesimen ashylady. Toleranttylyqtyń aıqyn kórinisi retinde aıshyqtalatyn etnostardyń mádenıet kórmesi sheńberinde óńirdegi 10-ǵa jýyq etnomádenı birlestik ózderiniń ulttyq salt-dástúri men mádenıetinen syr shertetin jádigerlerdi kópshilik nazaryna usynbaq», dedi Almaty oblystyq Qazaqstan halqy Assambleıasy hatshylyǵynyń basshysy Jandar Asan.
Merekelik is-sharalar aıasynda «The Spirit of Ethnos» ataýymen mádenı festıvali de ótkizilmek.
Sonymen qatar óńirdiń órkendeýi jolyndaǵy qajyrly qyzmeti men ultaralyq tatýlyqty dáripteýge sińirgen ólsheýsiz eńbegi úshin birqatar azamat Almaty oblysy ákiminiń «Alǵys hatymen» marapattalady.
«Merekeniń jańa jalpyhalyqtyq jáne kópshilikke jaqyn formatyn tanymal etýge qoǵamdyq pikir kóshbasshylary men zııaly qaýym, ásirese shyǵarmashylyq sala maıtalmandaryn tartýǵa mańyz beriledi», dep atap ótti J. Asan.