Qushaǵy keń Qazaq eli kóptegen ózge ult ókilderin baýyryna tartty. Elimizde bir shańyraq astynda ómir súrip júrgen túrli ult men ulystardyń birligi, yntymaǵy ózgelerge úlgi. Sońǵy ýaqytta qazaqsha sóıleıtin ózge ult ókilderi aıtarlyqtaı kóbeıgenin kórip júrmiz. Áskerı qurylymda árbir shaqyrylym arasynan qazaq tilin jaqsy meńgergen ózge ult ókilderi jyl saıyn kezdesedi, sonyń biri – 5571 áskerı bóliminiń materıaldyq jáne tehnıkalyq qamtamasyz etý rotasynyń sarbazy Bandar Isaev.
Bandar 2003 jyly 1 maýsymda Shymkent qalasynda dúnıege kelgen. Ol jastaıynan qazaq kórshileriniń balalarymen oınap ósti. О́zara aralas-quralas júrgendikten tili de qazaqshaǵa jatyq bola bastady. Mektep jasyna kelgende ulynyń qazaq tiline degen qabiletin ańǵarǵan ata-anasy oılanbastan qazaq mektebine bergen. 2017 jyly otbasymen birge Astana qalasyna qonys aýdarǵan. Ol jerde de qazaq mektebine baryp, bilim oshaǵyn sol jerde tamamdaǵan. 2022 jyldyń mamyr aıynda Bandar áskerı boryshyn óteý úshin Ulttyq ulan qataryna shaqyrylady. Bir aılyq daıyndyqty tolyq kólemde aıaqtap, áskerı ant qabyldaǵan sarbaz jaýyngerlik bóliniske bólinedi. Qazirgi kezde áskerı qyzmetti jete meńgergen sarbaz, bólimdegi úlgili áskerı qyzmetshi, senimdi dos, mindetine adal jaýynger.
Áskerge deıin bala kúninde Kavkaz halqynyń bıine degen qushtarlyǵy oıanyp, 6 jasynan bastap lezgınka bıimen aınalysqan. Bıdiń qyr-syryn jetik meńgergen Bandar 17 jasynda Astana qalasynda óziniń jeke bı zalyn ashyp, osy bı túrinen dáris bergen. Sondaı-aq 18 jasynda «Tiktok» áleýmettik jelisinde óziniń lezgınka bıimen tanymal bolǵan.
– О́zim kópultty otbasynan shyqqanmyn. Otbasymyz ýkraın, ázerbaıjan, túrik ultynyń ókilderinen quralǵan. Shańyraǵymyzda barlyǵymyz tek qazaqsha sóılesemiz. Kórshilerimizdiń bári qazaq otbasylary boldy. О́z elin qurmetteıtin, qadirleıtin adam tildi de tez meńgeredi. Ońtústiktiń, onyń ishinde qazaqılyqtyń ıisi ańqyp turǵan Shymkenttiń topyraǵy men aýasy jáne osy eldiń týmasy bolǵandyqtan da tildi meńgerip alýyma áser etken bolar. Qazirgi kezde qazaq tilin meńgergenime qatty qýanamyn. Meniń tilim de, janym da – qazaq. Men óz elimde erkin ómir súrip jatqanym úshin Qazaqstan halqyna, otbasymda meni sheksiz jaqsy kórip bar meıirimimen tárbıelegen ata-anama, meni qoldap árkez qasymda júrgen dostaryma, qarýlastaryma jáne quqyqtyq tártip áskeri – Ulttyq ulanǵa úlken alǵysymdy aıtamyn. Kóktemniń alǵashqy shýaǵymen birge kelgen Alǵys aıtý kúni merekesi qutty bolsyn. Jaqyndarymyzǵa jaqsylyq jasap, bir-birimizge alǵys aıtyp júreıik, – deıdi qatardaǵy jaýynger Bandar Isaev.
ALMATY