Áıgili «Dos-Muqasan» ansambliniń 55 jyldyǵy men Qazaqstannyń eńbek sińirgen qaıratkeri, ánshi-kompozıtor Murat Qusaıynovtyń 75 jyldyq mereıtoıyna oraı Tarazdaǵy «Balasaǵun» ortalyq konsert zalynda retro konsert uıymdastyryldy.
Elý jyldan astam ýaqyt boıy tanymal toptyń kórkemdik jetekshisi qyzmetin atqaryp kele jatqan Murat Qusaıynovtyń mereıtoıyna arnalǵan is-sharaǵa óńir basshysy Nurjan Nurjigitov arnaıy qatysyp, óner áleminiń óshpes juldyzyn mereıli jasymen quttyqtady.
– Qazaq ónerinde óshpes orny bar áıgili estradalyq vokaldy aspaptar ansamblin ár býyn, ásirese bizdiń qatarlastar men aǵa býyn qatty qurmetteıdi. Elý jyldan astam ýaqyt boıy ónerdiń órinen kórinip, tórinen túspegen «Dos-Muqasannyń» retro ánderi eshqashan ólmek emes. Ansambldiń negizin qalaýshylardyń biri, daraboz ánshi, belgili kompozıtor Murat aǵany mereıtoıymen quttyqtaımyz. Kenen Ázirbaev týǵan qasıetti Qordaıdyń týmasy retinde sizben árqashan maqtanamyz. О́ıtkeni óner álemindegi eseli eńbegińiz eldiń kóz aldynda. Ásirese bala kezimizden tyńdap ósken «Toı jyry» áni áli kúnge deıin halyqpen birge jasap keledi. Sol ýaqyttan beri úılený toılarynyń «gımnine» aınalǵany da ras. Ansambl repertýaryndaǵy óz shyǵarmalaryńyzdan bólek, halyq ánderi de halyqtyń júreginen óshpeıdi, – dedi N.Nurjigitov.
M.Qusaıynovtyń mereıtoıyna arnalǵan konsertke jınalǵan aǵa býyn ókilderi jastyq shaqty eske alyp, retro ánderdi súıikti ánshilerimen qosylyp shyrqady. О́nerdiń tórinen túspegen belgili ansambl múshelerine qoshemet kórsetti.
TARAZ