Abaı oblysyndaǵy týrızm salasyn damytýda aıdyndy Alakóldiń orny aıryqsha sanalady. О́tken jyly kól jaǵalaýyna 2 mln-ǵa jýyq adam kelip demalypty. Sondyqtan kelýshilerge qolaıly jaǵdaı jasaý jalǵasyn taýyp jatyr. Onyń ústine Abaı oblysyn áleýmettik – ekonomıkalyq damýyna arnalǵan keshendi josparda týrızm salasyn órkendetýge basa mán berilgen bolatyn. Osy rette Úrjar aýdanyndaǵy áýejaı týrızmdi damytý maqsatynda qaıta jańǵyrtylýda.
Áýejaıdyń ushyp-qoný jolaǵy 1 500 metrden 2 100 metrge deıin uzartylsa, eni 35 metrge deıin keńeıtilgen. Bul óz kezeginde Fokker, Bombardier, Embraer jáne basqa da osyǵan uqsas toptardyń ushaqtaryn qabyldaýǵa múmkindik beredi. Sonymen qatar uzyndyǵy 175 metr, eni 16 metr bolatyn 2 rýldeý jolynyń qurylysy júrgizildi.
Qazir áýejaıda áýe kemelerin táýlik boıy qabyldaýǵa qaýqarly bolýy úshin ushyp-qoný jolaǵyna jaryqtandyrý qondyrǵylary men beınebaqylaý ornatý jumystary júrgizilip jatyr. Búgingi tańda Almaty – Semeı – Úrjar baǵyty boıynsha reıster turaqty ushyp turady. Sonymen qatar áýejaı termınalynyń ǵımaratyn qaıta jańǵyrtýdyń jobalyq-smetalyq qujattary da ázirlený ústinde. Úrjar aýdanynyń ákimi Nurjan Toqseıtovtiń aıtýynsha, bıyl Úrjar aýdanynda saǵatyna 100-150 jolaýshyny qabyldaı alatyn jańa áýejaı ǵımaratynyń qurylysy bastalady. « Eki áýe kemesi turaqtaıtyn perron bir ýaqytta eki ushaqty qabyldaýǵa múmkindik beredi. 5 qabatty baqylaý munarasy jańadan salyndy. Qazir termınal saǵatyna 30-ǵa jýyq adamdy qabyldaıtyn bolsa, qurylys aıaqtalǵannan keıin bul kórsetkish aıtarlyqtaı artady. Aldaǵy mamyr aıynan bastap Úrjar – Astana baǵytynda áýe reısin iske qosý josparlanyp otyr», deıdi aýdan ákimi N.Toqseıtov.
Aıta keteıik, buǵan deıin oblystyq bıýdjetten bólingen qarajat esebinen Alakól jaǵalaýyndaǵy arbatqa abattandyrý, joldarǵa ortasha jóndeý jumystary júrgizilgen bolatyn. Alakól jazǵy demalys aımaǵynda «Tourist info» aqparattyq ortalyǵy bir tereze qaǵıdasy aıasynda demalýshylarǵa tegin aqparattyq jáne konsýltasııalyq qyzmet kórsetedi. Sonymen qatar Alakól jaǵalaýyna jaqyn Qabanbaı aýylynda órt sóndirý deposy da salynatyn bolady.