«Aqjeleń» arqalaǵan amanat

Keńes zamanynda oblys orta­lyǵynan shalǵaı jatqan qa­zaqy aýyldarda ǵana bolmasa, Qos­tanaıdyń ózinde ult aspaptary ansambli bolmaǵan. Mundaı múmkindik el táýelsizdiginiń ýyz kezeńinde ǵana týdy. 1993 jyly sol kezde oblysty basqaryp turǵan, stýdent kezinde ózi de orkestrde oınaǵan Kenjebek Úkiulynyń dárgeıimen Qur­man­ǵazy atyndaǵy ulttyq konser­vatorııanyń bir top túlegi Qos­tanaıǵa keldi. Osylaısha, tól ónerge sýsap qalǵan teriskeıde­gi aǵaıyn jańa ǵana qurylǵan «Aqjeleń» ansamblimen qa­ýysh­qan. Sodan bergi otyz jyldyń ishinde ansambl quramy da bir­neshe ret ózgerip, jańa aspaptarmen, tyń týyndylarmen tolyǵyp, kemel óner ujymyna aınaldy.

Konsert barysynda «Aqje­leńniń» oryndaýyndaǵy Qurman­ǵazynyń «Adaıy», Táttimbettiń «Sarjaılaýy» sııaqty klas­sıka­lyq kúı kerýeninen keıin, osy toıǵa arnaıy kelgen belgili kompozıtor, Qazaqstannyń eńbek si­ńirgen qaıratkeri Ermu­rat Úsenov sahnaǵa shyǵyp, óner ujymyn mereıtoıymen qut­tyqtady.

– Qostanaı óńirinde toqsa­nynshy jyldardan beri qaraı ja­ńasha lep paıda boldy. Qazaq óne­riniń ıisi shyǵa bastady. Sonyń bir aıǵaǵy, aımaqta ulttyq orkestr jáne osy «Aqjeleń» ansambli qu­ryl­dy. Bul jerde osy óner ujym­daryn uıymdastyrý barysynda shyr-pyr bolyp júrip, onyń árbir oryndaýshysyn, árbir repertýaryn ózi tańdap, eńsesin tiktep ketken baýyrymyz Nazymbek Mol­dahmetovtiń eńbegin aıtpaı ke­týge bolmaıdy. Árıne, «Or­nynda bar ońalar» degen, artynda izin jalǵaǵan ónerpaz ini-qaryn­dastarynyń bar ekenine táý­be deıik. Orkestr – ornynda. Búgin­de bul jerdegi óner ózgeshe jańa qy­ry­nan órkendep kele jatyr. An­sambl óziniń kórkemdik deńgeıin tómendetpeı, árqashan bıikten kó­rinip keledi. Otyz jylda bul ansambldiń barmaǵan jeri joq. Qazaqstannyń barlyq ólkesin aralap shyqty. Eńbekteriń jemisti, toılaryń qutty bolsyn! О́z basym «Aqje­leńge» de, osyndaǵy orkestrge de kóptegen shyǵarma jazdym, – dedi kompozıtor.

Odan keıin «Aqjeleń» folk­lorlyq-etnografııalyq an­sam­bli­niń otyz jyldyǵyna arnaıy jazylǵan «Aqqý Aqjeleń» kúıi men «Sáýletti Tobyl-Torǵaıym» áni sahnada tuńǵysh ret oryndaldy. Bul eki týyndynyń da avtory – Ermurat Úsenov. Dándi ólkeniń darqan dalasy men kerim tabıǵatyn, daryndy perzentterin dáripteıtin madaq ániniń sózin jer­gilikti aqyn, Qazaqstan Jazý­shylar odaǵynyń múshesi Abylaı Maýdanov jazǵan. Jańa ándi halyqaralyq baıqaýlardyń laý­reaty, jeztańdaı ánshi, Taraz qala­synan arnaıy kelgen Ja­nat­bek Qadyrov oryndady.

Konsert sońynda óner ujy­myn oblys ákiminiń orynbasary Rınat Muhametqalıev pen oblystyq mádenıet basqar­ma­sy­nyń basshysy Erlan Qal­maqov quttyqtap, «Aqjeleń» ansambliniń birneshe múshesin «Mádenıet salasynyń úzdigi» tósbelgisimen, taǵy birqatar óner­pazdy oblys ákiminiń Alǵys hatymen marapattady.

Qostanaı oblysy