Munaıly óńirdiń ortalyǵy – Atyraý qalasynan alystaǵy Janbaı aýylynda turatyn Aınur Sısekenova jańa ónim shyǵarýdy qolǵa aldy. Jańa ónim degende, qalbyrǵa salynǵan túıe eti týraly aıtyp otyrmyz.
Basqa óńirdi qaıdam, Atyraý oblysynda buryn-sońdy dál mundaı ónim shyǵarylǵan joq. Árıne, kez kelgen dúkenniń sóresinde sıyr, jylqy, qoı eti salynǵan qalbyrdyń túr-túri samsap tur. Biraq qalbyrdaǵy túıe eti týraly estigenińiz bar ma edi?
«Suranysqa ıe otandyq ónim shyǵarý úshin úlken shaharda turý shart emes. Halyq tutynatyn sapaly ónimdi alystaǵy aýylda da jasaýǵa bolady. Mundaı isti qolǵa alý úshin aldymen ynta qajet. Izdengen adamnyń isi ońǵa basady», deıdi Janbaı aýylynda turatyn kásipker Aınur Sısekenova.
Aýyl kásipkeriniń aıtýynsha, birneshe jyldan beri Janbaı aýylyndaǵy «Ryspaı Qurasov» sharýa qojalyǵynyń quramyndaǵy «Temirlan» jeke kásipkerligi et jáne shujyq ónimderiniń onnan astam túrin daıyndaıdy. Endi jaqynda «Naryn» ataýymen túıe etinen jasalǵan ónimdi naryqqa shyǵara bastady.
«Alǵash kásibimdi «Bastaý Bıznes» jobasymen shaǵyn dúken ashýdan bastaǵan edim. Keıin zamanaýı tehnologııa ornatylǵan shaǵyn seh ashyp, 10-ǵa jýyq aýyldasymdy jumysqa tarttym. Qazir shaǵyn sehymyzda et jáne shujyq ónimderin daıyndaımyz. Bári – otandyq ónim. Sol sebepten shyǵar, tutynýshynyń suranysy artyp tur. Munda jartylaı fabrıkat ónimderi de bar. Aldymen tutynýshy talabyna erekshe mán berip, ónim sapasyn arttyrýdy kózdeımiz. Jaqynda túıe etin konservige salyp shyǵara bastadyq. Qalbyrdy Almaty qalasynan aldyramyn. О́nim sapaly bolýy úshin qalbyrlar mindetti túrde zalalsyzdandyrylady. Arnaıy qurylǵymen týralǵan túıe etin tuzdap qoıamyz. Sodan keıin ǵana qalbyrǵa salynady», deıdi aýyl kásipkeri.
Baǵasy 1000 teńge turatyn túıe eti salynǵan konservi ázirge Isataı aýdanynyń tutynýshylaryna ǵana satylyp jatyr.
Atyraý oblysy