«Amanat» partııasynyń respýblıkalyq saılaýaldy shtabynyń músheleri Qostanaı oblysynyń Arqalyq qalasynda saılaýshylarmen birqatar kezdesý ótkizdi.
Kezdesýge 300-den astam adam qatysty. Shtab músheleri partııanyń saılaýaldy baǵdarlamasyndaǵy óńirlerde áleýmettik jáne kommýnaldyq ınfraqurylymdy damytýǵa baǵyttalǵan negizgi basymdyqtar týraly aıtty.
– El aýmaǵyndaǵy monoqalalardyń problemalary bir-birine uqsas. Halyq kóship jatyr, ınjenerlik jeliler men joldardyń tozyǵy jetken. Bilim jáne medısına salalarynda da sheshilmegen máseleler bar. Azamattardyń usynys-pikiriniń negizinde partııa árbir óńir úshin jeke saılaýaldy baǵdarlama ázirledi. Onda jol sapasyn jaqsartýǵa, áleýmettik ınfraqurylymdy damytýǵa, ınternetpen qamtamasyz etýge baǵyttalǵan jáne basqa da júıeli sharalar qamtyldy, – dedi partııa tóraǵasy Erlan Qoshanov.
Ol Arqalyqty damytý maqsatynda Úkimet keshendi jospar ázirlegenin jáne partııa qala turǵyndarymen birlesip onyń iske asyrylýyna qoǵamdyq baqylaýdy qamtamasyz etýge tıis ekenin atap ótti.
Budan soń shtab músheleri Arqalyq jylý energetıkalyq kompanııasynyń eńbek ujymymen kezdesip, tozyǵy jetken kommýnaldyq jelilerdiń jaı-kúıin talqylady. 2027 jylǵa deıin partııa 40 shaqyrym elektr jáne sý qubyry jelilerin, sondaı-aq 65 shaqyrym káriz jelilerin qaıta jańartýdy qamtamasyz etedi.
Jalpy elimiz boıynsha turǵyn úıler ınfraqurylymyn jańǵyrtýdyń aýqymdy jobasy iske qosylady. Energetıka salasyn basqarýdy reformalaý jalǵasady. Tıimdilik pen ınvestısııalyq tartymdylyqty arttyrý arqyly jeliler men nysandardy odan ári jańartýǵa jol ashý josparlanyp otyr.
Bul kúni shtab músheleri shaǵyn jáne orta bıznes ókilderimen de júzdesti. Partııalyqtar bıznesti júrgizý boıynsha qarapaıym erejelerdi qamtamasyz etýge kúsh salatynyn atap ótti. 2027 jylǵa deıin kem degende 15 myń artyq retteýshi kedergi joıylady. Zańnama deńgeıinde ekonomıkadaǵy monopolııany joıý jáne adal básekelestikti damytý jumysy júrgiziledi.