Qostanaı qalasynda «Aýyl» partııasynan Parlament Májilisiniń depýtattyǵyna partııalyq tizim boıynsha kandıdattar Qaırat Aıtýǵanov, Nıkolaı Arsıýtın, Sofııa Ábdirazaqova, Svetlana Prokopeva, Rabıǵa Toqseıitova, Berikjan Qaıypbaı dóńgelek ústel uıymdastyrdy.
Jıynǵa otbasylyq agrarlyq áýletterdiń negizin qalaýshylar, fermerlerdiń ata-analary men týystary, stýdent jastar, «Aýyl» partııasy músheleri, agro sala, bilim jáne mádenıet ókilderi qatysty. Is-shara «Barlyǵy tyńdalýǵa tıis!» uranymen ótti. Jıynnyń maqsaty da sonymen úndes.
– Memleket tarapynan fermerlerge bólinip jatqan kómektiń olarǵa úlken mashaqatpen jyrymdalyp jetetini, tipti jetpeıtini búginde barshaǵa aıan. Jany kúıgen jas fermer ishki qyjylyn janyndaǵy jaqynyna ǵana aıtady. Ári qaraı shyqpaı ishte shemen bolyp qatady. Bul óte shetin jáne qaýipti másele. Múmkin balasynyń aıta almaı júrgenin ata-anasy aıtar. Sondyqtan da fermerlerdiń ata-analaryn jınap, muń-muqtajǵa qulaq túrip, jıyn ótkizip jatyrmyz. «Aýyl» partııasy aýyl problemasyn óte jaqsy biledi jáne olardy sheshý boıynsha naqty ózindik kózqarasy bar. Bizdiń saıası platformamyzda jalpy aýyldyq aýmaqtardy jáne árbir aýyldyq eldi mekendi damytýǵa, atap aıtqanda, olardyń ótkir turǵan ekonomıkasy, áleýmettik, ınjenerlik jáne óndiristik ınfraqurylymy máselelerine mańyzdy ról berilgen. Partııa Májiliske barǵanda osy ustanymdardy odan ári qorǵap, qolda bar barlyq yqpal etý tetikteri men resýrstardy paıdalana otyryp, baǵdarlamalyq qujattaryn iske asyrady. Biz úshin aýyl árqashan basymdyq pen qurmetke ıe, – dedi kandıdat Qaırat Aıtýǵanov.
«Aýyl» partııasynyń saılaýaldy baǵdarlamasymen jan-jaqty tanysqan, onyń balalary aıta almaı júrgen máselelerdi sheshýge baǵyttalǵanyna kóz jetkizgen ata-ana óz taraptarynan usynystaryn joldady. Kezdesý Qostanaı aýdany, Zarechnoe aýylynda ornalasqan «Qazaq tulpary» JShS jylqy zaýytynyń aýmaǵynda jalǵasty. Kandıdattar AО́K ókilderimen «Qostanaı jylqy tuqymyn damytý máselelerin anyqtaý jáne sheshý» taqyrybynda talqylady.