Qazaqstannyń birinshi raketkasy Aleksandr Býblık tennısten BAÁ-niń Dýbaı qalasynda ótip jatqan ATR-500 týrnıriniń ekinshi aınalymynan asa almady.
Tusaýkeser kezdesýinde jerlesimiz Aleksandar Lazarovpen kúsh synasty. Birinshi set Býblıktiń aıqyn jeńisimen aıaqtaldy – 6:1. Odan keıin jaraqatyn jeleý etken bolgarııalyq tennısshi jarysty jalǵastyrýdan bas tartty. Ekinshi kezeńde ol Danııl Medvedevpen kezdesti. Bul kúnderi álemdik reıtıngte jetinshi orynda turǵan 27 jastaǵy Reseıdiń ókili sporttyń bul túrinde kóptegen bıik belesti baǵyndyrdy. Atap aıtsaq, sońǵy eki jylda US open dodasynda dara shyqty, Aýstralııanyń ashyq birinshiliginiń fınalynda eki márte oınady. ATR týrnırlerin 17 ret utty. Osydan týra bir jyl buryn Medvedevtiń álemdik reıtıngte kósh bastaǵany da esimizde. Osyndaı myqty oıynshyǵa Aleksandr laıyqty qarsylyq kórsete almady. 1 saǵat 5 mınýtke sozylǵan báseke 6:4, 6:2 esebimen reseıliktiń paıdasyna sheshildi.
Chılı astanasy Santıagoda da halyqaralyq týrnır ótip jatyr. Bul jarystyń juptyq saıysynda Andreı Golýbev pen Aleksandr Nedovesov óner kórsetti. Ekinshi kezeńde jerlesterimiz úndistandyq Shrıram Baladjı men Djıvan Nedýnchejııanǵa 5:7, 6:4, 6:7 esebimen ese jiberdi.