Kórermenin kútetin premeralar

Jıynda Q.Qýanyshbaev atyn­daǵy memlekettik akademııalyq Qazaq mýzykalyq drama teat­ry­nyń dırektory Aıbolat Jaý­dyr, rejısser, Qazaqstannyń eńbek sińirgen qaıratkeri Nur­lan Jumanııazov, «Gúlder» ansam­bliniń kórkemdik jetekshisi jáne dırıjeri Serik Dáýletov aldaǵy josparlar týraly baıandady.

Aıbolat Jaýdyrdyń aıtýynsha, óner ujymy bıyl 8 premera josparlap otyr.

«Naýryz aıynyń 3, 4, 5 kún­de­ri Erkin Jýasbektiń «Úılený» ­mýzy­kalyq komedııasynyń pre­me­rasyn usynamyz. Rejısseri – Qa­zaqstannyń eńbek sińir­gen qaı­­ratkeri Nurlan Juma­nııa­zov. Kompozıtory – Serikjan Ábdi­nurov. Spektakl teatrdyń ha­lyq aspaptar ansambliniń sú­ıe­meldeýimen ótedi. Dırıjeri – Ma­ral­jan Myrzaqulova. Sondaı-aq Sultanáli Balǵabaevtyń «Qyz jıyrmaǵa tolǵanda» týyndysy jelisimen qoıylym daıyndalyp jatyr. Janry – melodrama. Rejısseri – Qazaqstannyń eńbek sińirgen qaıratkeri Dáýren Serǵazın. Premerasy 11, 12 naý­ryz kúnderi ótedi. Odan bó­lek, erkin shyǵarmashylyqqa arnal­ǵan «Qalleki» teatr­ zertha­nasy «Keshki toǵyz» spek­takl-konsertiniń premera­syn usynady. Rejısseri – Bá­zil ­Sul­tanǵazy. Zerthananyń maq­saty – shyǵarmashyl jandar úshin baılanys ortasyn qurý jáne óner­ge ózgeshe kózqaras jasap, tyń dúnıelerdi sahnalaý», dedi teatr dırektory.

Sáýir aıynda teatr sahnasynda Bolat Uzaqovtyń rejısserligimen sahnalanǵan «Joshy han» tarıhı dramasy da usynylady. Týyndy avtory – Dýman Ramazan. Oǵan qosa Qazaqstannyń halyq ártisi Tilektes Meıramovtyń 75 jyldyǵyna oraı «Áke» spek­takliniń premerasy josparlanyp otyr.

M.Býlgakovtyń týyndysy je­lisimen «Jendetter», M.Ha­se­nov­tiń shyǵarmasy negizinde «Paı-paı, jas jubaılar-aı» spektaklderi de kórermendi qýant­­paq. Rejısseri – Nurlan Jumanııazov.

«Qazan aıynda J.Shaıhıs­lamuly «Qyz Jibek» spektakli­niń premerasy usynylady. Jańa qoıylymdy sahnalaý úshin Qazaqstan, Reseı teatr festı­val­deriniń laýreaty, Re­seı teatr­ óneri ınstıtýtynyń (GITIS) stýdenti, D.A.Krymov pen E.B.Ka­menkovıch sheberhanasynda tálim alyp júrgen rejısser Áli­bek О́mirbekuly shaqyrylady. Qur­man­ǵazynyń 200 jyldyǵyna oraı halyq aspaptar ansambli­niń «Kúı atasy – Qurmanǵazy» atty konserti ótedi. Teatr ujymy ma­myr aıynyń 2-8 kúnderi ara­ly­ǵynda Almaty qalasyna gastroldik saparmen barady. Al 19-25 maýsym aralyǵynda Pet­ropavl qalasynda atalǵan oblys ákimdiginiń qoldaýymen Temir­bek Júrgenovtiń 125 jyl­dyǵyna arnalǵan Qazaqstan drama teatr­larynyń XXIH respýblıkalyq festıvalin ótkizeıin dep otyrmyz», dedi Nurlan Jumanııazov.

Roza Baǵlanova atyndaǵy «Qazaqkonsert» memlekettik kon­serttik uıymynyń dırektory Aqtoty Raıymqulova «Gúlder» ansambliniń tusaýkeser konserti joǵary deńgeıde ótkenin aıtty.

«Aldaǵy jumys jospary bo­ıynsha jańa quramdaǵy «Gúl­der» án-bı ansambliniń eli­miz­degi jáne shetelderdegi gastroldik is-sapary bastalady. Qyr­ǵyzstan, О́zbekstan, Majarstan, Belgııa, Fransııa elderinde óner kórsetedi. Aldaǵy mindet – jańa quramdaǵy «Gúlder» ansam­blin jáne ózge de mádenıet jaý­harlaryn halyqaralyq kásibı arenalarǵa shyǵarý, dúnıejúzine kórsetý. Odan bólek, ansambldiń muraǵattaǵy materıaldarymen kóp jumys istedik. Túrli fotosýretter, beınematerıaldar men kostıýmder, 6-8 derekti fılm tabyldy. Osy tusta atap óte­tetin jaıt, ansambldiń arda­gerleri Qazaqstannyń halyq ártisi Gúljan Talpaqova, Qa­pash Qulysheva, Altynbúbi Omar­bekova, Tatıana Aýtalıpova qundy jádigerlerdi kúni búginge deıin kóziniń qara­shyǵyndaı saqtap, bizge amanat etti. Tatıana Qaıyrbaıqyzy­nyń arqasynda Altyn qordan eki qo­ıylym tap­tyq. Olar – «Bıpyl», «Asa­taıaq» jáne «Malaızııa», dedi A.Raıymqulova.

Sondaı-aq spıker Altyn qor­dan alynǵan «16 qyz», «Sý tasýshy», «Kýá bol» áýenderine «Gúl­der» ansambliniń kórkemdik je­tek­shisi Serik Dáýletovtiń bas­tamasymen jańadan aranjırovka jazylǵanyn atap ótti.