О́zbekstannyń bas shahary – Tashkentte alaýy tutanǵan dzıýdoshylardyń «Úlken dýlyǵa» sanatyndaǵy kezekti jarysy aıaqtaldy. Atalǵan jarystyń alǵashqy eki kúninde eki otandasymyz fınaldyq saıysta beldesti.
Atap aıtqanda, jarystyń alǵashqy kúninde 60 kılodaǵy otandasymyz Nurqanat Serikbaev fınaldyq synǵa alqynbaı jetkenimen, bas júlde úshin ótken básekede koreıalyq Kım Von Djınge ese jiberip, Tashkent tatamıinde kúmis júldeger atandy. Jerlesimiz týrnırdiń irikteýinde ázerbaıjandyq Rovshan Alıev pen saýdııalyq Mýtaz Havdjany tize búktirse, shırek fınalda jarys qojaıyny Dılshodbek Baratovtan aılasyn asyrdy. Al jartylaı fınalda grýzııalyq Lýhýmı Chhvımıanıdi jeńip ketti.
Kelesi kúni Nurqanattyń izin ala 73 kılodaǵy Azııa chempıony Danııar Shamshaev ta fınaldyq saıysqa joldama aldy. О́kinishke qaraı, bas júlde úshin ótken beldesýde Shamshaev ta qarsylasyna jol berip qoıdy. Otandasymyz aqtyq synda jarys qojaıyny Mýrodjan Iýldoshevtiń osal tusyn taba almady. Shamshaev bastapqy básekelerinde fransııalyq Aksýs Bendjamın men qyrǵyz Shyńǵyshan Sagınalıevtiń adymyn ashtyrmasa, shırek fınalda túrkııalyq tatamı sheberiniń jolyn kesti. Jartylaı fınalda shveısarııalyq Nıll Shtamptan basym tústi.