«Qazaqstan temir joly» ulttyq kompanııasy Qytaıdyń Sııan qalasyndaǵy qurǵaq port aýmaǵynda termınal salatyn boldy. Osy maqsatta Qytaı tarapy 8 gektar jer bólýge daıyn. Bul týraly ulttyq kompanııa basshylyǵynyń Qytaıǵa sapary kezinde málim boldy.
Kezdesý barysynda kólik marshrýttary men ınfraqurylymdy damytý máseleleri talqylanǵan. Taraptar Sııan qalasy Qytaıdyń eń iri kólik-logıstıkalyq haby ekenin atap ótti.
«Onyń aýmaǵynda «Sııan halyqaralyq saýda-logıstıkalyq parki» halyqaralyq qurǵaq porty ornalasqan. Osy qurǵaq portqa júkterdiń 40%-y Qazaqstan tarapynan keledi. Sondaı-aq munda QHR-EO qatynasymen jóneltilgen konteınerlik poıyzdardyń jalpy kóleminen konteınerlerdiń 30%-y qalyptastyrylady», delingen habarlamada.
Kezdesý qorytyndysy boıynsha kelisimge qol qoıylyp, soǵan sáıkes Sııan qalasyndaǵy qurǵaq port aýmaǵynda termınal salý úshin 8 gektar jer ýchaskesi bólinbek. Qala merııasy «QTJ» UK» AQ-ǵa jańa logıstıkalyq jobany iske asyrý boıynsha qoldaý kórsetýge daıyn ekenin rastaǵan.
Júk tasymaly máselesinde Qytaıdyń basty kózir el bolyp turǵany jasyryn emes. Buǵan deıin QTJ basshylyǵy «Qytaı temir joldary» MK basshylarymen de kezdesý ótkizgen edi. «Qytaı temir joldary» MK-nyń basshysy Lıý Chjenfan atap ótkendeı, «Qazaqstan temir joly» delegasııasy – bul pandemııadan keıin Qytaı tarapy qabyldaǵan alǵashqy ákimshilik.
Kezdesýde eki el arasyndaǵy júk tasymaldaý kólemi oń qarqyn kórsetip otyrǵany atap ótildi. 2022 jyly júk tasymaly 23 mln tonnany qurap, tarıhı maksımýmnan asqan. Bul 2021 jylmen salystyrǵanda 15%-ǵa kóp. Taraptar Qazaqstan arqyly ótetin halyqaralyq kólik dálizderin damytý máseleleri boıynsha yntymaqtastyqtyń aǵymdaǵy jaı-kúıi men perspektıvalaryn talqylady. QHR-dan ımport máselesine de erekshe nazar aýdaryldy.
Kezdesýde jańa jobalar týraly da aıtyldy. Naqtylasaq, Dostyq – Moıynty ýchaskesin jańǵyrtý jáne Baqty – Tachen ýchaskesinde úshinshi temirjol shekara ótkelin salý máseleleri qaraldy.