Oral qalasyndaǵy Halyq Qaharmany Hıýaz Dospanova atyndaǵy №30 mektep oqýshylary men ustazdary naýryz aıy týǵaly jappaı ulttyq kıim kııýge kóshti.
– Bul bastamanyń tarıhy 2018 jyldan bastalady. Sol kezde mekteptiń birneshe muǵalimi naýryz aıynda ulttyq kıim kıip júretin. Kele-kele buǵan bastaýysh synyp oqýshylary qosyldy. Al qazir mektebimizde bilim alyp júrgen 2 myńnan asa oqýshy, búkil ustaz ujymy kóktemniń alǵashqy kúninen bastap qazaqy qamzol-beshpent kıe bastaıdy. Bul bizdiń shákirtterimizdiń ata-analary erekshe qoldaǵan ádemi dástúr boldy, – deıdi mektep dırektorynyń orynbasary Janna Ǵabdyqyzy.
Rasynda da, №30 mektepte ata-analar qaýymy erekshe belsendi kórinedi. Máselen, synypta kópbalaly nemese turmysy tómen otbasynyń balalary bolsa, kómektesip, demeýshilik kórsetip jiberedi eken. Keıbir synypqa qamzol men beshpentti sheber tiginshi ananyń ózi tigip bergen.
14 naýryz – Batys Qazaqstanda úlken-kishi bir-birimen qushaq jaıa kórisetin halyqtyq mereke. Dál sol kúni №30 mekteptiń aýlasy keremet toıǵa, jaınaǵan jármeńkege aınalady. Aýlaǵa qazandyq qurylyp, ulttyq taǵamǵa toly dastarqan jaıylady. Bul da Hıýaz mektebinde birneshe jyldan beri qalyptasqan dástúr. «Bıyl bizdiń ata-analarymyz Ulystyń uly kúnine oraı balalarǵa arnap ertegi qoıylym kórsetpekshi. Qazir soǵan daıyndyq qyzý júrip jatyr», deıdi Janna Ǵabdyqyzy.
Aıta keteıik, Hıýaz mektebiniń keremet úlgisi búginde qaladaǵy ózge mektepterge de taraı bastaǵan. Sondaı-aq shahar kóshelerinde ulttyq naqyshty kıimder kıip, dástúr men mádenıetimizdi nasıhattaýshylar kóbeıip keledi.
Batys Qazaqstan oblysy