Aıbergenov mektebindegi mýzeı

Búginde aqynnyń týǵan jerinde, tabany tıgen ólkelerden bólek, birneshe qalada qundy estelikteri saqtaýly. Astana qalasyndaǵy T.Aıbergenov atyndaǵy №16 orta mek­teptiń mýzeıin shaǵyn deme­seńiz, aqynnyń ómiri men shyǵar­ma­shylyǵyn tanyp-bilemin degenge azyq bolarlyq dúnıeler saq­taýly tur.

Jýyrda osy mektepke baryp, aqyn qurmetine ashylǵan mýzeıdi tama­shalaýdyń sáti túsken edi. Ár jyl­dary osy mýzeıge óz isin jetik biletin, poezııaǵa janashyr us­taz­dar jetekshilik etse, qazir sol aǵa býyn áriptesterdiń amanatyn qazaq tili men ádebıeti pániniń muǵalimi Gaýhar Júsipova arqalapty. Mektep 1979 jyly ashylsa, 2001 jyly bilim mekemesine T.Aıber­­genovtiń esimi berilgen. Sodan araǵa attaı alty jyl salyp, 2007 jyly 23 jeltoqsanda kóptiń usy­nys-tilegimen Aıbergenov mý­zeıi ashylyp­ty. Mine, 2000 jyl­dardyń bas kezinen-aq mektep ujymy «Bir toıym bar» dep jyr­laǵan aqynnyń týǵan kúnin atap ótetin dástúr qalyptastyrdy. Aı­ta keteıik, mektep ujymy 2018 jyly qalalyq mektep mýzeı­le­riniń baıqaýyna qatysyp, bas júlde jeńip alǵan.

– О́zim 2017 jyldan beri mýzeı jetek­shisimin. Aqyn atyndaǵy mektep mýzeıine jetekshi bolǵan soń, birer jylda Aı­bergenov poe­zııasyn tereńirek túsinip, qal-qadirimshe sony jas óskinderge jet­kizýdi maqsat tuttym. Mýzeı ashyl­ǵan jyly mektep dırek­torynyń tárbıe isi jónindegi orynbasary Aqbota Esa­matova Tólegen Aıbergenovtiń qyzy Aı­nar Tólegenqyzymen birge issa­parǵa shyq­qan. Aqtóbe, Shym­kent, Almaty, Tash­kentke baryp, biraz qundy derek jı­naǵan. Tólegen Aıbergenov bilim alǵan Tashkenttegi Nızamı ınstıtýtyn­da da aqyn­nyń estelikteri saq­talǵan. Osy tusta mýzeıdiń ashy­lýyna yqpal etip, rýhanı sha­ńyraqqa jetekshi bolǵan aqyn Ersaıyn Narymbaevtyń eńbegin esten shy­ǵarmaǵanymyz durys dep oılaımyz. Ol kisimen biz kúni búginge deıin baılanystamyz. Mýzeıge jıi kelip turady, – deıdi Gaýhar Júsipova.

Mekteptiń mýzeıge aparatyn dálizinde Aıbergenovtiń sýreti, óleń joldary, qaz-qatar tizilgen kitap­tary kózge ottaı basylady. Kóp uzamaı mýzeıge kire bergende tórdegi Aıbergenovtiń sý­retin baıqadyq. Sol sýrettiń mań­­daıynda «Saǵynyp kelip, saǵyntyp ketken aqyn» degen bir aýyz sóz shoqtyǵy bıik aqyn­nyń talantyn aıqyndaı tús­ken. Munda aqynnyń kóz qa­ra­­shyǵyndaı saqtalǵan qun­dy jádigerdiń biri retinde úıindegi saǵaty, ydys-aıaq jáne qoljaz­balarynyń kóshirmesin aıtýǵa bolady. Mýzeıdiń sol jaq bury­shynda aqynnyń týǵan jeri Qa­raqalpaqstannyń Qońyrat aýda­nyndaǵy, keıingi stýdenttik jyldary ótken Tashkenttegi, mektep dırektory bolyp qyzmet etken Saryaǵashtaǵy, shyǵar­mashylyǵyn shyńdaǵan ásem qala Almatydaǵy jyldary jaıynda keń maǵlumat bar. Sondaı-aq shyǵarmashylyq jolda dos-syrlas bolǵan qazaqtyń belgili aqyn-jazýshylary men kompozıtorlary, sonymen birge, Tólegen Aıbergenov atyndaǵy syı­lyqtyń laýreattary jóninde de málimettermen tanysýǵa bolady. Munda aqyn óleńiniń orys, aǵyl­shyn tiline aýdarylǵan nus­qasyn elektrondy formatta oqýǵa da múmkindik bar.

Mektep ujymy jyl saıy­n Aıber­genovtiń týǵan kúnine oraı shyǵarmashylyq kesh, qala deńgeıinde ádebı jáne ǵy­lymı jobalar baıqaýyn, mýzeı saǵaty, poezııa saǵaty, tipti sporttyq is-shara uıym­das­tyrýdy daǵdyǵa aınaldyrǵan.

Al mekteptiń májilis zalyna apa­ratyn dálizde aqynnyń óleń jolda­ryn­daǵy peızajdy sheber sýrettep, qa­ǵaz betine túsirgen oqýshylardyń eńbegi ilýli tur. Bul aqynnyń 85 jyldyq mereıtoıynda daryndy oqýshylar salǵan tańdaýly sýretter eken.

Tólegen Aıbergenovtiń mura­syn saqtap otyrǵan mektep ujymy áýeli aqynnyń shyǵarmashylyǵyn nasıhattaýǵa basymdyq beretini sózsiz. Sondyqtan kez kelgen sy­nyptyń oqýshysy aqynnyń kem degende bir óleńin jatqa biledi.