«Amanat» partııasynyń respýblıkalyq saılaýaldy shtabynyń músheleri Jambyl oblysynyń saılaýshylarymen kezdesti. Shtab músheleri aldymen Qarataý qalasynyń jurtshylyǵymen júzdesip, oǵan 200-den astam adam qatysty.
Mundaǵy turǵyndardy jumyssyzdyq, tozyǵy jetken kommýnaldyq ınfraqurylym, turǵyn úı qymbatshylyǵy jáne medısına qyzmetkerleriniń tapshylyǵy máseleleri tolǵandyrady. Partııa tóraǵasy Erlan Qoshanov partııa aýyl turǵyndarynyń ál-aýqatyn arttyrý maqsatynda jyldyq mólsherlemesi 2,5%-dy quraıtyn jeńildetilgen nesıe berý, lızıng arqyly aýyl sharýashylyǵy tehnıkasyn jańartý, kooperatıvter qurý isine atsalysatynyn atap ótti. Bul bastama «Aýyl amanaty» jobasy aıasynda qolǵa alynady.
E.Qoshanov partııanyń basty mindetiniń biri – Úkimet nazaryn tek iri qalalar men Astanaǵa ǵana emes, óńirlerge aýdarý ekenin aıtty. «Kópshilik qazaqstandyqtar úshin turǵyn úı satyp alý máselesi qıyndaı tústi. Joǵary paıyzdyq mólsherleme men ınflıasııa aıtarlyqtaı kedergi keltirip jatyr. Bizdiń kúsh-jigerimiz qala men aýyl turǵyndarynyń ómir súrýine qolaıly jaǵdaı jasaýǵa baǵyttalady. Iаǵnı otandastarymyz turǵyn úımen jáne sapaly ınfraqurylymmen qamtamasyz etilýge tıis», dedi partııa tóraǵasy.
Aldaǵy 5 jylda Jambyl oblysynda 9 myńǵa jýyq otbasy baspanaly bolady. Al jalpy el aýmaǵynda «Amanat» partııasy 730 myńnan astam otbasy úshin qoljetimdi baǵadaǵy 78 mıllıon sharshy metrden astam jańa turǵyn úı salý josparyn iske asyrýǵa kepildik beredi. Buǵan qosymsha, apatty jáne tozyǵy jetken turǵyn úılerdiń 30 myńǵa jýyq ıesi jańa páterge kóshýge múmkindik alady. Al jumyspen qamtý máselesin sheshý úshin 2027 jyldyń sońyna deıin «Amanat» partııasy Jambyl oblysynda keminde 84 myń jumys ornyn qurýǵa yqpal etedi.
Al partııanyń respýblıkalyq saılaýaldy shtabynyń músheleri Aıdos Sarym men Almas Almatov Qyzylorda oblysyndaǵy úgit jumysy aıasynda Jalaǵash aýdanyna qarasty Tań jáne Aqqum aýyldyq okrýgterindegi saılaýshylarmen kezdesti. Munda kandıdattar «Tań LTD» JShS eńbek ujymymen júzdesip, dıqandarǵa partııanyń saılaýaldy baǵdarlamasyn tanystyrdy. «Biz kóktemgi egis jumystaryna fermerler úshin jeńildikpen janar-jaǵarmaı bólýdiń ashyq ári ádil tetigin engizemiz», dedi Aıdos Sarym.