Bilim berý uıymdarynda qaýipsizdikti qamtamasyz etý jónindegi sharalar Premer-mınıstr Álıhan Smaıylovtyń tóraǵalyǵymen ótken Úkimet otyrysynda qaraldy, dep habarlaıdy Egemen.kz Premer-mınıstrdiń baspasóz qyzmetine silteme jasap.
Oqý-aǵartý mınıstri Ǵanı Beısembaev 2020 jylmen salystyrǵanda respýblıkada beınebaqylaý júıelerimen qamtamasyz etilgen bilim berý uıymdarynyń sany 2,5 esege, lısenzııalanǵan kúzeti 7 esege jáne 21 esege, eskertý túımeleri artqany týraly baıandady. Búgingi tańda osy baǵyttardaǵy jumys jalǵasyp jatyr.
Sonymen qatar balalardyń qaýipsizdik júıesin jetildirý úshin bilim berý uıymdaryndaǵy birinshi basshylardyń derbes jaýapkershiligin kúsheıtý, olardaǵy baqylaý-ótkizý rejıminiń tártibin aıqyndaý, daǵdarys jaǵdaıynda qaýipsiz minez-qulyq daǵdylaryn qalyptastyrýǵa basa nazar aýdara otyryp, tárbıe jumysyn qaıta formattaý jáne pedagogtardy daıarlaý men qaıta daıarlaý baǵdarlamasyna jańa taqyryptyq modýldi engizý josparlanǵan.
Ishki ister mınıstri Marat Ahmetjanov atap ótkendeı, elimizde bilim berý obektilerin terrorızmge qarsy qorǵaý jónindegi nusqaýlyq bekitilgen. Onyń sheńberinde 300-ge deıin oqýshysy bar mekemelerde beınebaqylaý jáne qulaqtandyrý júıeleri bolýy tıis, al 700 adamǵa deıingi obektilerde – beınebaqylaýlardy jedel basqarý ortalyqtaryna (JBO) qosý jáne dabyl túımelerin ornatý, 700-den astam adamy bar jáne oblys ortalyqtarynyń barlyq mektepterinde týrnıketter men qosymsha lısenzııalanǵan kúzetpen shart bolýy tıis. Búgingi tańda QR TJM-men birlesip barlyq bilim berý uıymdaryna keshendi tekserý júrgizilýde.
О́ńirlerde júzege asyrylyp jatqan sharalar týraly Soltústik Qazaqstan oblysynyń ákimi Aıdarbek Saparov, Aqtóbe oblysynyń ákimi Eraly Toǵjanov jáne Abaı oblysynyń ákimi Nurlan Ýranhaev baıandama jasady.
Premer-mınıstr baıandamashylardy tyńdap, balalardyń qaýipsizdigin qamtamasyz etý máselesi – memlekettiń asa mańyzdy mindetteriniń biri ekenin atap ótti.
«Ata-ana mekteptegi balasynyń jaǵdaıy men qaýipsizdigi úshin alańdamaýy qajet», dedi Álıhan Smaıylov.
Onyń aıtýynsha, bul baǵytta normatıvtik te, uıymdastyrý jaǵynan da barlyq deńgeıde júıeli sharalar qabyldanyp jatyr. Memleket basshysynyń tapsyrmasyna sáıkes Balalardy qorǵaý jónindegi keshendi jospardyń jobasy ázirlendi. Bilim berý uıymdaryn dabyl knopkalarymen jáne beınebaqylaý júıelerimen jabdyqtaýǵa, olardy polısııa bólimshelerine qosýǵa, lısenzııalanǵan kúzetpen qamtamasyz etýge qoıylatyn talaptar kúsheıtildi.
«Bilim berý uıymdarynda qaýipsizdik talaptarynyń saqtalýyna turaqty túrde monıtorıng júrgizilýi tıis», dedi Premer-mınıstr.
Sonymen qatar atqarylǵan sharalarǵa qaramastan, óńirlerde problemalar áli de jetkilikti. Beınebaqylaý ornatylǵan mektepterdiń arasynda kameralary standarttar men tehnıkalyq talaptarǵa sáıkes kelmeıtin mektepter de bar. Elimizdegi 1100-ge jýyq mektep polısııanyń jedel basqarý ortalyqtaryna qosylmaǵan. Baqylaý rejımi qatań saqtalmaıdy.
«Túrkistan jáne Soltústik Qazaqstan oblystaryndaǵy mektepterde lısenzııalanǵan kúzet qyzmetterimen kelisimder jasalmaǵan. Kúzetke kóbinese arnaıy daıarlyqtan ótpegen adamdar tartylady. Osy máselelerdiń barlyǵyn dereý sheshý kerek. О́ıtkeni bul – balalarymyzdyń qaýipsizdigi», dep atap ótti Álıhan Smaıylov.
Osyǵan baılanysty Úkimet basshysy osy jyldyń 1-shi sáýirine deıin mektepterdi tıisti qaýipsizdik júıelerimen jabdyqtaý jumystaryn aıaqtaýy qajettigin aıtty.
«Bul polısııanyń jedel basqarý ortalyqtaryna shyǵatyn beınebaqylaýǵa, mamandandyrylǵan kúzetpen jáne dabyl knopkalarymen qamtamasyz etýge qatysty», dep atap ótti Úkimet basshysy.
Sonymen qatar Premer-mınıstr úsh kún merzimde Úkimetke balalardy qorǵaý jónindegi keshendi jospardyń pysyqtalǵan jobasyn engizýdi tapsyrdy, oǵan ýákiletti organdardyń vedomstvoaralyq ózara is-qımyl algorıtimin jetildirý jónindegi is-sharalar kirýi tıis.